Ուկրաինայի արտաքին գործերի նախարար Անդրեյ Սիբիհան հայտարարել է, որ կշարունակի կարգավորել հարաբերությունները Վրաստանի հետ։

Ուկրաինայի և Վրաստանի միջև հարաբերությունները լարված են եղել, նախ՝ Միխեիլ Սաակաշվիլիի բանտարկության պատճառով, իսկ հետո հատկապես սրվել են 2022 թվականին Ռուսաստանի լայնածավալ ագրեսիայի պատճառով։

Թբիլիսին մեղադրել է Կիևին իրեն պատերազմի մեջ ներքաշելու փորձի համար, նաև ավերված ուկրաինական քաղաքների լուսանկարներն օգտագործել է նախընտրական քարոզչության համար։ Վլադիմիր Զելենսկին հայտարարել է, որ «Վրացական երազանք»-ը ներկայացնում է Ռուսաստանի շահերը, և պատժամիջոցներ են կիրառվել Բիձինա Իվանիշվիլիի, Իրակլի Կոբախիձեի և այլ բարձրաստիճան պաշտոնյաների նկատմամբ։

Սիբիհան ասել է, թե ճիշտ է, որ ուկրաինա-վրացական օրակարգում կան որոշակի «զգայուն հարցեր», բայց ամեն դեպքում իրենք պատրաստ են առաջ շարժվել։

«Մենք ցանկանում ենք նոր էջ բացել մեր վրացի գործընկերների հետ։ Մեր առաջնորդների միջև տեղի ունեցավ պատմական հանդիպում Երևանում։ Դա մտքերի լավ փոխանակում էր։ Մենք բաց ենք այս կառուցողական երկխոսությունը շարունակելու համար։ Ես մոտ ապագայում կհանդիպեմ իմ վրացի գործընկերոջ հետ Մոլդովայում։ Մենք ցանկանում ենք պատշաճ կերպով կարգավորել մեր երկկողմ հարաբերությունների դիվանագիտական ​​գիծը։ Մեր ժողովուրդը, մեր հասարակություններն արժանի են դրան», — ասել է Սիբիհան Բրյուսելում:

Ավելի վաղ՝ մայիսի 6-ին, Անդրեյ Սիբիհան հեռախոսազրույց է ունեցել Մակա Բոճորիշվիլիի հետ և ասել, որ իրենք համաձայն են շարունակել հարաբերությունների կարգավորման գործընթացը։