Օրերս «Պատիվ ունեմ» խմբակցության ղեկավար, ԱԱԾ նախկին տնօրեն Արթուր Վանեցյանն Ազատության հրապարակում նստացույց էր անում` Արցախի փրկության և ըստ այդմ` ՀՀ իշխանություններին հեռացնելու օրակարգով։ Վանեցյանն այս օրերին տված հարցազրույցներում բազմից նշել է, որ այլևս չի վերադառնալու խորհրդարան, չի պատկերացնում այնտեղ իր աշխատանքը: «Մի խորհրդարանում, որտեղ հայտարարում են, որ Արցախը կարող է լինել Ադրբեջանի կազմում, որ Արցախում ապրող հայը կարող է ապրել ադրբեջանցու ենթակայության տակ, ես այդ խորհրդարանում չգիտեմ այլևս ինչով պետք է զբաղվեմ»,- ասել է նա:

Վանեցյանի այս խոսքերից ելնելով լրատվականներում լուր տարածվեց, որ նա պատրաստվում է վայր դնել մանդատը: Թեմայի վերաբերյալ Vesti.am-ը մեկնաբանություն խնդրեց «Հայրենիք» կուսակցության մամուլի խոսնակ Սոս Հակոբյանից:

Վերջինս ասաց. «Պարոն Վանեցյանն ասել է՝ համարեք մանդատը վայր դրած է: Ինքը չի գան խորհրդարան՝ աշխատելու այն մարդկանց հետ, ովքեր ասում են՝ եկեք Արցախը ինչ-որ անհասկանալի օրակարգով տանք Ադրբեջանին: Արթուր Վանեցյանը չի պատրաստվում զբաղվել պատգամավորական գործունեությամբ, քանի որ արդեն կա Ազատության հրապարակի այս օրակարգը: Մանդատները, ֆորմալ առումով, մի օր այս շարժման ընթացքում կարող են պետք գալ՝ գուցե ԱԺ-ում ելույթի, քվերակության կամ այլ նպատակով: Բովանդակային առումով այդ մանդատն այևս ոչ մեկին պետք չէ, իսկ ձևական իմաստով այն կարող է օգնել այս շարժմանը»: