Չինաստանում թափ է հավաքում մի արտասովոր միտում. տղամարդկանց հետ ծանոթանալ ցանկացող աղջիկները սկսել են գործել կադրերի ընտրության մասնագետների (ռեկրուտեր) նման։ Նրանք փոխանակվում են պոտենցիալ զուգընկերների ինքնակենսագրականներով (CV) և երաշխավորող նամակներ պահանջում նրանց նախկին ընկերուհիներից, հայտնում է South China Morning Post-ը։
Այս գաղափարն առաջացել է սոցցանցերում տարածված մի հրապարակումից հետո, որտեղ մի աղջիկ դժգոհում էր արժանապատիվ երիտասարդ գտնելու դժվարություններից և խնդրում էր մյուս աղջիկներին «ուղղորդել» իրենց նախկիններին՝ օգտագործելով կադրային բաժնի բառապաշարը։
Օգտատերերը պաշտպանել են այս թրենդը՝ ներկայացնելով իրենց նախկին սիրեցյալներին փորձառու ռեկրուտերների ոճով։ Ցզիլին նահանգից մի աղջիկ նույնիսկ առաջարկել է դիտարկել իր ներկայիս ընկերոջ թեկնածությունը. «Հարաբերությունների դադարեցման դեպքում անմիջապես կտեղեկացնեմ ձեզ։ Նա, իրականում, բավականին առատաձեռն է»։
Որոշ մասնակիցներ «երաշխավորող նամակների» կազմմանը մոտեցել են առավելագույն լրջությամբ. նշել են ծննդյան թիվը, հասակը, աշխատավայրը, էմոցիոնալ կայունությունը, կենցաղային հմտությունները և թույլ կողմերը։ «Արժանի է դիտարկման», — իր տպավորություններով կիսվել է օգտատերերից մեկը։
