ԱՄՆ նախագահ Դոնալդ Թրամփի վարչակազմը չի կարող դադարեցնել միլիոնավոր ամերիկացիներին տրամադրվող պարենային օգնությունը՝ շարունակվող կառավարական շաթդաունի ժամանակ, ուրբաթ օրը վճռել է դաշնային դատարանը՝ հայտարարելով, որ նպաստները վճարելու համար կառավարությունը պետք է օգտագործի անկանխատեսելի ծախսերի համար նախատեսված միջոցները, հաղորդում է Reuters-ը։
Մի քանի րոպեի տարբերությամբ Մասաչուսեթսի և Ռոդ Այլենդի դատավորների կայացրած երկակի որոշումները կայացվել են երկու դատական գործընթացների շրջանակում, որոնք ուղղված էին ԱՄՆ գյուղատնտեսության նախարարության կողմից Սննդային օգնության լրացուցիչ ծրագրի (հայտնի որպես SNAP կամ պարենային կտրոններ) շրջանակներում տրամադրվող նպաստների դադարեցումը կանխելուն։ Դա պետք է սկսվեր շաբաթ օրը։
ԱՄՆ գյուղատնտեսության նախարարությունը հայտարարել է, որ բավարար միջոցներ չկան 42 միլիոն ցածր եկամուտ ունեցող ամերիկացիներին ամբողջ ծավալով նպաստներ վճարելու համար, քանի որ դրանք ամսական կազմում են 8,5-9 միլիարդ դոլար։ Թրամփի վարչակազմը պնդում է, որ գործակալությունը լիազորություն չունի նրանց աշխատավարձ վճարելու համար, քանի դեռ Կոնգրեսը չի ընդունել ծախսերի մասին օրինագիծը, որը վերջ կդնի հոկտեմբերի 1-ին սկսված կառավարության աշխատանքի դադարեցմանը («շաթդաունին»):
Սակայն Փրովիդենսի ԱՄՆ շրջանային դատավոր Ջոն Մակքոնելը՝ քաղաքների, ոչ առևտրային կազմակերպությունների և արհմիության հայցի վերաբերյալ վիրտուալ լսումների ավարտին հայտարարել է, որ վարչակազմի որոշումը՝ չօգտագործել 5,25 միլիարդ դոլար պահուստային ֆոնդերից նոյեմբերյան նպաստները ֆինանսավորելու համար, կամայական է եղել, հավելելով, որ դրանք նախկինում երբեք չեն դադարեցվել։
Մի քանի րոպե առաջ Բոստոնում ԱՄՆ շրջանային դատավոր Ինդիրա Թալվանին որոշել է, որ վարչակազմը սխալ պնդում է արել այն մասին, որ շաթդաունի ժամանակ իրեն օրենքով արգելված է արտակարգ իրավիճակների միջոցներն օգտագործել SNAP նպաստները վճարելու համար։
Դատական հայցը ներկայացրել են դեմոկրատների կողմից գլխավորվող 25 նահանգներ և Կոլումբիայի շրջանը: Հայցվորները պնդում էին, որ ԱՄՆ Գյուղդեպարտամենտը (USDA) դեռևս միջոցներ ունի SNAP-ի նպաստների իր պարտավորությունները կատարելու համար, չնայած նրան, որ շաթդաունը դեռ շարունակվում է:
Նման ֆինանսավորումը ներառում է 5.25 միլիարդ դոլարի չափով պահուստային միջոցներ, որոնք Կոնգրեսը նախկինում տրամադրել էր ԱՄՆ գյուղատնտեսության նախարարությանը՝ «անհրաժեշտ ծրագրային գործողություններն իրականացնելու համար», հայտարարել են հայցվորները։ Բացի պահուստային ֆոնդերից, հայցվորները պնդում էին, որ SNAP ծրագրով վճարումների աննախադեպ կասեցումը կանխելու համար կարող էր օգտագործվել նաև մոտավորապես 23 միլիարդ դոլարի առանձին ֆոնդ։
