Լրատվականները հրապարակում են լուսանկար, որոնցում երևում է, որ Մեղրի-Ագարակ ճանապարհին անցակետ է տեղադրված, որը վերահսկվում է ռուս խաղաղապահների կողմից։ Թեմայի վերաբերյալ Vesti.am-ը հարցեր է ուղղել Մեղրի համայնքի ղեկավար Բագրատ Զաքարյանին։

-          Պարո՛ն Զաքարյան, արդյո՞ք կա նման անցակետ և ի՞նչ նպատակով է տեղադրված։

-          Այո, մոտ 8-9 ամիս տեղադրված է և ծառայություն է կատարում։ Անվտանգության իրավիճակը վերահսկելու նպատակ է հետապնդում։ Դրա մասին պետակն սահմանի մասին օրենքում մանրամասն գրված է։

-          ՀՀ իշխանության նախաձեռնությամբ է անցակետ տեղադրվե՞լ, թե ռուս խաղաղպահների՞։

-          Չի կարող լինել ռուս խաղաղպահների նախաձեռնությունն առանց օրենքների։ Գոյություն ունի Պետական սահմանի մասին օրենք, որտեղ հստակ նշված է։ Այդ օրենքը գործում է 10 տարուց ավելի։ Ուղղակի հիմա, ելնելով քաղաքական իրավիճակից, ծառայության մոտեցումը, ռուսական սահմանպահ զորքերի կողմից, այլ տեսանկյունից է դիտարկվում: Իսկ այն ինչը որ արվում է, դա օրենքի սահմանում է։ Այո, խռովություն է առաջանում քաղաքացիների շրջանում, քանի որ կանգնեցնում են, ստուգում են, և այլն, և այլն։

-          Նշեցիք, որ քաղաքական իրավիճակից ելնելով՝ Պետական սահմանի մասին օրենքի կիրառելիության անհրաժեշտություն կա։ Ի՞նչ քաղաքական իրավիճակ կարող է լինել Հայաստանի Հանրապետության ներքին ճանապարհին։

-          Դուք Հայաստանի Հանրապետությունում չեք ապրո՞ւմ, չգիտե՞ք ինչ վիճակ է։ Չգիտե՞ք, որ մեծ քաղաքականության արդյունքում ներկա պահին ճանապարհների, սահմանների խնդիր է լուծվում։

-          Բայց խոսքը ներքին ճանապարհի մասին է։ Նշեցիք նաև, որ անվտանգային խնդիր է լուծվում։ Դուք, որպես համայնքի ղեկավար ի՞նչ անտանգային խնդիր եք տեսնում այդ հատվածում։

-       Լավ ասացինք։ Ես համայնքի ղեկավար եմ և անվտանգության մասով կհամագործակցեմ համապատասխան գերատեսչությունների հետ՝ պետական մակարդակով։ Ես առանձին որոշումներ՝ անվտանգության մասով, կայացնելու իրավասություն չունեմ։

-          Հարցս Ձեր կողմից միանձյա որոշում կայացնելուն չէր վերաբերում, այլ նրան, թե, որպես համայքի ղեկավար, ինքներդ անվտանգային խնդիր տեսնո՞ւմ եք համայքի բնակիչների համար։

-          Առայժմ անվտանգային խնդիր չկա, ամեն ինչ նորմալ է, բնականոն հունով կյանքը շարունակվում է այս պահի դրությամբ։ Իսկ անվտանգային խնդիրների հետ կապված հարցերով դիմեք համապատասխան մարմիններին։

-          Նշեցիք, որ առայժմ խնդիր չկա, սպասվո՞ւմ են խնդիրներ։

-          Համայքի ղեկավարի լիազորություններից դուրս հարցեր են։ Ես հո Նաստրադամուսը չեմ, որ սկսեմ հիմա գուշակություններ անել։

-          Գուշակությունների մասին չէ խոսքը: Դուք ասացիք, որ քաղաքական իրավիճակով է պայմանվորված, հետո էլ նշեցիք, որ առայժմ անվտանգային խնդիր չկա։

-          Ես ասում եմ, որ քաղաքական իրավիճակ կա։ Դուք չգիտե՞ք, որ աշխարհաքաղաքական լարված իրավիճակ է, ես դա եմ ասում։