Թուրքիան առաջարկել է Հայաստանի հետ հարաբերությունները կարգավորելու համար ևս մեկ հանդիպում անցկացնել Անկարայում կամ Երևանում, սակայն մինչ այժմ պատասխան չկա, «ՌԻԱ Նովոստի»-ին հայտնել է Անկարայում դիվանագիտական աղբյուրը։
«Եթե մենք խոսում ենք երկու երկրների հարաբերությունների կարգավորման գործընթացի մասին, ապա տրամաբանական կլինի, որ բանակցություններն ընթանան առանց երրորդ երկրների, ուժերի մասնակցության։ Մենք առաջարկել ենք հանդիպում անցկացնել Անկարայում կամ Երևանում, սակայն դեռ պատասխան չենք ստացել», - ասել է գործակալության զրուցակիցը։
Նրա խոսքով՝ Թուրքիայի և Հայաստանի միջև հարաբերությունների կարգավորման խոչընդոտներից մեկը հայկական սփյուռքի ճնշումն է։
«Որոշ դեպքերում գործընթացը սաբոտաժի է ենթարկվում։ Բայց մենք հույս ունենք, որ նորմալացման գործընթացը կշարունակվի», - հավելել է աղբյուրը։
Աղբյուր՝ Aysor.am
