Առողջապահության նախարարությունը պարզաբանում է՝ ինչու են ուշացրել պոլիկլինիկաներում բուժաշխատողների աշխատավարձը.
«Պոլիկլինիկաներում բուժաշխատողների աշխատավարձի ուշացումների վերաբերյալ հստակեցնում ենք.
Պոլիկլինիկական օղակի բուժաշխատողներն աշխատավարձը ստանում են երկու կտորով` պետական պատվերով իրականացված ծառայությունների և արդեն Առողջության համընդհանուր ապահովագրության ծառայությունների դիմաց:
Առաջին կտորի` պետական պատվերով տրամադրված բուժծառայություների դիմաց, փոխհատուցումն իրականացված է:
Հաշվի առնելով, որ ապահովագրության համակարգի մեկնարկային առաջին ամիսն է, նոր համակարգով փոխհատուցումներ իրականացնելու համար բուժկենտրոններին տրվել էր լրացուցիչ ժամանակ կատարողականներում նոր ներդրված ծառայությունների մուտքագրումների, ճշգրտումների համար:
Վաղվա ընթացքում ֆինանսավորումը կբացվի:
Շնորհակալ ենք ըմբռնումով մոտեցման համար»։
Ավելի վաղ 24News-ը հայտնել էր, որ Մալաթիա-Սեբաստիա առողջության կենտրոնի (թիվ 19 պոլիկլինիկա) բուժքույրերը դեռևս չեն ստացել հունվար ամսվա աշխատավարձը: Բուժքույրերն իրենց վրդովմունքն են հայտնել ստեղծված իրավիճակի շուրջ և տեղեկացրել, որ հունվար ամսին էլ դեկտեմբերի աշխատավարձն են ուշացումով ստացել:
