Մի պահ հանգիստ թողնենք չստացված քահանա անտեր Ստեփանին ու վերադառնանք այն հարցերին, որից մեզ ցանկանում է շեղել իշխանությունը։
Օրերս կառավարության նիստին Նիկոլ Փաշինյանը բողոքում էր խցանումներից. լսեցի, ու տպավորություն էր, որ Երևանի քաղաքապետը և վարչապետը տարբեր քաղաքական թիմերից են, չէ որ ըստ քաղաքապետի ու իր ավագանիների` կարմիր գծերի թանկացումը բերելու էր քաղաքի (կենտրոնի) բեռնաթափմանը ու դրա պատճառով սակագինը կտրուկ թանկացավ` հասնելով տարեկան 160 հազար դրամի։
Հետո հիշեցի, որ կարմիր գծերի թե' 2024, թե' 2025թթ թանկացումը Վարչական դատարանի կողմից «Մայր Հայաստան» խմբակցության դիմումների հիման վրա երկու տարբեր գործերով ոչ իրավաչափ է ճանաչվել։
Հետո հիշեցի, որ Երևանի քաղաքապետարանը/իշխող ավագանին, խախտելով վարույթի կասեցման պահանջը, շարունակում է ոչ իրավաչափորեն տուգանել քաղաքացիներին։
Հետո կրկին հիշեցի, որ ըստ Նիկոլ Փաշինյանի` խցանումների վիճակը շատ վատ է, այսինքն` Նիկոլ Փաշինյանը ևս համաձայն է, որ քաղաքը չի բեռնաթափվել, այսինքն` Նիկոլ Փաշինյանը ևս համաձայն է, որ կարմիր գծերի թանկացումը չի բերել քաղաքի կամ գոնե կենտրոնի բեռնաթափման։
Ենթադրվում է, որ Երևանի ավագանու իշխող խմբակցությունը ականջալուր կլինի գոնե իրենց իսկ քաղաքական ղեկավարին և կչեղարկի հետայսու ոչ միայն Վարչական դատարանի կողմից, այլև իրենց քաղաքական ղեկավարի կողմից ոչ արդյունավետ ճանաչված կարմիր գծերի թանկացումը։
Իրավաբան Վահե Գրիգորյանի ֆեյսբուքյան էջից
