Երևանի ընդհանուր իրավասության դատարանի Կենտրոնի նստավայրում մեկնարկում է «Սրբազան պայքար» շարժման առաջնորդ Բագրատ Սրբազանի և նրա 17 կողմնակիցների դեմ քրեական գործով առաջին դատական նիստը։
Դատարանի բակում հավաքվել են աջակիցները։ Այստեղ է նաև ԱԺ պատգամավոր Լևոն Քոչարյանը։ «Բնակչության մեծ մասը հասկանում է՝ որ դատավորներն են, որ պատրաստ են իրականացնել արդարադատություն, ովքեր են իշխանությունների քմահաճույքները կատարում։ Էս առումով մեծ սպասելիքներ չկան»,- լրագրողների հետ զրույցում ասել է նա։ Քոչարյանը պատասխանել է նաև այլ հարցերի։ Մասնավորապես, արձագանքելով լուրերին՝ ըստ որի «Հայաստան» խմբակցության որոշ պատգամավորներ բանակցում են Սամվել Կարապետյանի թիմ տեղափոխվելու համար, ասել է․ «Նման բան չկա։ Չգիտեմ ինչի վրա եք հղում անում, բայց վստահաբար նման բան չկա»։
