ՌԳ Պետդումայի
պատգամավոր Միխայիլ Դելյագինը նախօրեին Ռուսաստանի հանրային հետուստատեսությամբ կարծիք
էր հայտնել, որ Միացյալ Նահանգները իրենց արբանյակ պետությունների՝ մասնավորապես Թուրքիայի
և Ադրբեջանի միջոցով ագրեսիա են իրականացնում և Ռուսաստանի համար իրական վտանգ են ստեղծում:
«Եթե դրա համար կոշտ և միանշանակ չպատժվեն, ապա մեր ինչին է պետք Ադրբեջանի նավթարդյունաբերությունը,
իսկ այն շատ խոցելի է: Եթե մարդիկ բառերը չեն հասկանում, ապա պետք է սկսեն գործողությունները
հասկանալ: Եթե մենք դա չանենք, մենք գոյություն չենք ունենա»,- ասել է Դելյագինը:
Հետաքրքիր է,
որ ՌԴ նախագահի խոսնակ Դմիտրի Պեսկովը հայտարարել է, որ Դելյագինի հայտարարությունը
ոչ մի կերպ չի համապատասխանում ՌԴ պաշտոնական գծին: Սակայն առավել հետաքրքիր է այն ձևակերպումը, որով Պեսկովը մեկնաբանել է Դելյագինի
խոսքերը:
«Այս իրավիճակում, երբ Ռուսաստանն ակտիվ ջանքեր է
գործադրում Ղարաբաղում խաղաղության ապահովման և երկրների կողմից իրենց պարտավորությունների
կատարման համար, անհրաժեշտ է կրքերի զսպվածություն»,- ասել է Պեսկովը:
Ըստ ամենայնի,
և Պեսկովի խոսքերն անուղղակիորեն հաստատում են իրողությունը, Ռուսաստանում շատ լավ
հասկանում են, որ Ադրբեջանի ագրեսիվ գործողություններն իսկապես խաթարում են այն հարաբերական
«հավասարակշռությունը», որ ուկրաինական պատերազմից առաջ Ռուսաստանը փորձեց ապահովել
Անդրկովկասում: Ռուսաստանի քաղաքական վերնախավում ավելի ու ավելի հաճախ են հնչում այդպիսի
կարծիքներ, բայց պատգամավոր Դելյագինն առաջինն էր, որ «պաշտոնական գծից» առավել խիստ
և ուղղագիծ արտահայտվեց Ռուսաստանի նորահայտ դաշնակցի վարած ակնհայտ հակառուսական քաղաքականությանը:
Չի բացառվում, որ եթե Ադրբեջանում այդքան հիստերիկորեն չքննադատվեր Դելյագինի խոսքը,
ապա Դմիտրի Պեսկովն ընդհանրապես չարձագանքեր:
