Ուկրաինացի լրագրող,
հակառուսական պրոպագանդայի առաջամարտիկ Դմիտրի Գորդոնը երեկ հարցազրույց է տվել ադրբեջանական
Pressklub TV-ի պրոդյուսեր
Ռահիմ Սադիբեյլիին, և, ի թիվս այլ հարցերի, անդրադարձել է ադրբեջանաուկրաինական հարաբերություններին:
Անակնկալ չէ, որ ադրբեջանական քարոզչությունը Ուկրաինայի հետ հարաբերություններում
հիմնական շեշտադրումն անում է Արցախյան հարցի, դրա կարգավորման գործում Ռուսաստանի
հակաադրբեջանական դիրքորոշման վրա և զուգահեռներ է փորձում տանել Դոնբասում հատուկ
օպերացիայի հետ: Դա իրենց գործն է: Բայց խիստ ուշագրավ է Գորդոնի տեսակետը արցախաադրբեջանական
հակամարտությանը, որը նույնական է Ուկրաինայի պետական պաշտոնական քաղաքականության հետ:
«Ես հիացած եմ
ադրբեջանական բանակի գործողություններով: Շատ լավ է, որ Թուրքիան և Իսրայելը զենք տվեցին
Ադրբեջանին: Կցանկանայի, որ Թուրքիան և Իսրայելն իրենց ակտիվ դրսևորեին Ուկրաինայի
հարցում, Ուկրաինային ավելի շատ բայրակթարներ տային, ինչպես օգնեցին Ադրբեջանին»,-
նկատի ունենալով 44-օրյա պատերազմը՝ ասել է այդ Գորդոնը: Փաստացիորեն Գորդոնը ողջունում
է ադրբեջանցիների կողմից նույն բայրակթարներով և ուկրաինական ֆոսֆորային զենքերով Արցախի
խաղաղ բնակչության, քաղաքների ու բնակավայրերի ռմբակոծությունները: Նույն բանի համար
հիմա ուկրաինացիներն ու Արևմուտքը, նրանց պոչին կպած Ադրբեջանը մեղադրում են իբր Ռուսաստանի՞ն:
Ադրբեջանը միշտ
է եղել հակառուսական տիրույթում, թեև դա քողարկել է կեղծ բարեկամական դիֆերամբներով:
Օրեր առաջ էլ Ալիևը Ռուսաստանի հետ դաշնակցային պայմանագիր ստորագրեց, բայց ողջ ադրբեջանական
պետական քարոզչությունն այսօր աշխատում է Ռուսաստանի դեմ, ամեն օր այդ երկրում պրոուկրաինական
հանրահավաքներ են անցկացվում, Ադրբեջանն անվճար բենզին է տրամադրում Ուկրաինային, իսկ
ադրբեջանցի կամավորները մեկնում են Ուկրաինայում Ռուսաստանի դեմ կռվելու, իսկ Արցախում կրակում են ռուս խաղաղապահների ուղղությամբ, խոչնդոտում են նրանց գործողություններին:
Եթե ոմանց համար
դա գաղտնիք է, ապա այս Գորդոնն այդ ամենը շատ լավ գիտի: Իմանալով է, որ նույն հեռուստաեթերում
շնորհակալություն է հայտնում Ադրբեջանի ժողովրդին և անձամբ Իլհամ Ալիևին՝ Ուկրաինային
«աջակցության և բարեկամության ձեռք մեկնելու» համար: Արդյո՞ք այսքանից հետո Ռուսաստանում
Ադրբեջանի և անձամբ Իլհամ Հեյդարովիչի գործողությունները շարունակում են համարել բարեկամական
և դաշնակցային: Գորդոնը սպառնում է, որ այս պատերազմից հետո շատ երկրներ հաշիվ են ներկայացնելու
Ռուսաստանին: Իսկ Ռուսաստանը Ադրբեջանին հաշիվ ներկայացնելո՞ւ է:
