Foto

Ինձ հաջողվել է խելացի և պատասխանատու մարդկանց հավաքել նույն միջավայրում․ Արա Զոհրաբյան

Այսօր փաստաբանների պալատը նոր նախագահ է ընտրել։ Ներկայիս նախագահ Արա Զոհրաբյանը ողջունել է փաստաբանների ընտրությունը և հաջողություն մաղթել գործընկերոջը։ Vesti.am-ը զրուցել է Փաստաբանների պալատի ներկայիս նախագահ Արա Զոհրաբյանի հետ։

Ձեր ֆեյսբուքյան գրառմամբ շնորհավորել էինք փաստաբանների պալատի նորընտիր նախագահին։ Սիմոն Բաբայանից ի՞նչ սպասելիքներ ունենք։

-  Սիմոն Բաբայանի հետ երկար տարիների համագործակցության փորձ ունեմ և տեսել եմ իր պրոֆեսիոնալիզմը, բարեխղճությունը և պատասխանատվության զգացումը: Սպասելիքս է, որ զարգացնի ՀՀ փաստաբանների պալատը, ավելին անի, քան ես եմ կարողացել անել:

–Որպես պալատի նախագահ ի՞նչ կարևոր գործընթացներ եք սկսել, որ կարծում եք պետք է շարունակվեն և ի՞նչ նոր բարեփոխումների կարիք կա։

- Մեկ բանի մասին կնշեմ, որ հաջողվել է խելացի և պատասխանատու մարդկանց հավաքել նույն միջավայրում: Շատ լավ, բարեխիղճ և պատասխանատու աշխատակազմ է ստեղծվել, մեկ ընտանիքի նման, առանց որոնց հնարավոր չէր որևէ ծրագիր իրականացնել: Փաստաբանների պալատը կենդանի օրգանիզմ է, իր առօրյա խնդիրներով, հնարավոր մարտահրավերներով: Պալատում մշտապես սրտացավ և աչալուրջ աշխատանքի կարիք կա՝ եղած լավը պահելու և զարգացնելու:

–Նախորդ տարիների նախագահների աշխատանքում ի՞նչն եք կարևորում։

- Սրտացավությունը փաստաբանական համայնքի նկատմամբ:

–Նշել էիք՝ «Փաստաբանները մերժեցին քանդելու, քաոս ստեղծելու և բամբասանքների ճանապարհը»: Ըստ Ձեզ փաստաբանները թեկնածուներից ո՞ւմ մերժեցին, որ իր հետ բերելու էր նշած արհավիրքները։

- Ընտրելով Սիմոն Բաբայանին՝ բնականաբար մերժել են Գևորգ Գյոզալյանի ծրագիրը: Վերջինս հաճախ էր օգտագործում քանդել բառը: Քարոզչության սև փիառի մեթոդն էր որդեգրել և պատասխանը ստացավ փաստաբաններից: Մեր փաստաբաններն իրավագիտակից մարդիկ են, կարողանում են թացը չորից տարբերել:

–Հոկտեմբերի 5-ից դադարելու է Ձեր գործունեությունը, որպես պալատի նախագահ, ի՞նչ հետագա պլաններ ունեք։

- Ես փաստաբան եմ, հոկտեմբերի 5-ից հետո էլ փաստաբան եմ մնալու: Մասնագիտական ոլորտում եմ լինելու, ինչպես նաև քաղաքական գործունեությամբ եմ զբաղվելու:

Դատական համակարգի նկատմամբ հանրային վստահության լուրջ խնդիրներ ունենք։ Ի՞նչն է խանգարում իրավական պետության զարգացմանն  ու առաջընթացին։

- Այս խնդիրը եղել է և մշտապես լինելու է: Բազմիցս նշել եմ, որ Գրիգոր Տաթևացու դեռևս 14-րդ դարում նշված 4 պատճառները պետք է վերացնել՝ կաշառք, երեսպաշտություն, վախ և տգիտություն: Պետության ջանքերը պետք է ուղղվեն այս պատճառների վերացման դեմ՝ դատավորներին վերապատրաստելու, նյութական պայմանները բարելավելու, իրական անկախությունն ապահովելու, այլ ազդեցություն բանեցողների նկատմամբ պատիժներ սահմանելու և այլ միջոցներով:

Հեղինակ: Eduard Saribekyan