Ուկրաինայի պաշտպանության նախարար Միխայիլ Ֆյոդորովը հայտարարել է հրաժարական տալու մասին։ Նա ամփոփել է այս պաշտոնում իր վեցամսյա գործունեությունը։ Ֆյոդորովն իր հաջողությունների թվում նշել է ռուսների համար Starlink-ի անջատումը, Ղրիմում «լոգիստիկ լոքդաունը» և միջին ու հեռահար հարվածներ հասցնող անօդաչու թռչող սարքերի ձեռքբերումը։ «Պաշտպանության նախարարի պաշտոնում ուկրաինացի ժողովրդին ծառայելը մեծ պատիվ էր»,— գրել է նա և հավելել, որ կշարունակի օգնել բանակին։
Հուլիսի 12-ին Ուկրաինայի նախագահ Վլադիմիր Զելենսկին հայտարարել է կառավարությունում կադրային փոփոխությունների և վարչապետ Յուլիա Սվիրիդենկոյի պաշտոնանկության մասին՝ ներքին ու արտաքին քաղաքականության ռազմավարությունը թարմացնելու նպատակով։ Գերագույն Ռադան կողմ է քվեարկել այս որոշմանը։ «Ուկրաինսկայա պրավդա»-ի աղբյուրների տվյալներով՝ Զելենսկին որոշել է հեռացնել Ֆյոդորովին պաշտոնից՝ Ուկրաինայի զինված ուժերի գլխավոր հրամանատար Ալեքսանդր Սիրսկու հետ ունեցած «համակարգային հակամարտության» պատճառով։ The Economist-ը գրել էր, որ նախարարը փորձում էր հասնել գեներալի հրաժարականին։
Զելենսկին պլանավորում է նրա պաշտոնում նշանակել Ներքին գործերի նախարար Իգոր Կլիմենկոյին։ Ընդ որում, Ֆյոդորովը կմնա նախագահի թիմում։ Նախքան 2026 թվականի հունվարին Պաշտպանության նախարարություն տեղափոխվելը, նա զբաղեցնում էր փոխվարչապետի՝ Թվային տրանսֆորմացիայի նախարարի պաշտոնը։ Սա արդեն Ուկրաինայի ռազմական գերատեսչության ղեկավարի հինգերորդ փոփոխությունն է 2022 թվականին ռուսական ներխուժման մեկնարկից ի վեր։
Պաշտպանության նախարարի խորհրդական Սերգեյ Բեսկրեստնովն արտահայտվել է ի պաշտպանություն Ֆյոդորովի՝ ենթադրելով, որ նրա պաշտոնանկության պատճառ կարող էր հանդիսանալ գերատեսչությունում կոռուպցիոն սխեմաների դեմ պայքարը։ Բլոգեր Սերգեյ Ստերնենկոն հայտնել է, որ այլևս չի հանդիսանում պաշտպանության նախարարի խորհրդական՝ հայտարարելով, թե «պետությունը շատ ավելի հեռացավ հաղթանակից»։
Financial Times-ը Ֆյոդորովի հրաժարականն անվանել է կառավարությունում ամենանշանակալի կադրային փոփոխությունը, որը կարող է հարվածել երկրի ռազմական ջանքերին։ Պարբերականը նրա անվան հետ է կապում ուկրաինական «անօդաչուների հեղափոխության» զարգացումը, Պաշտպանության նախարարության բարեփոխումն ու բանակի համալրման համակարգը փոխելու փորձերը՝ նշելով, որ Ֆյոդորովն իր ժամանակակից մոտեցումներով կարող էր նյարդայնացնել ռազմական հրամանատարությանը և խանգարել ազդեցիկ դեմքերին՝ գումար աշխատել պաշտպանական պայմանագրերի վրա։
