Լուվրի աշխատակիցները հերթական անգամ գործադուլ են հայտարարել փարիզյան թանգարանի տնօրինության հետ ունեցած տարաձայնությունների ֆոնին, ինչի պատճառով հունվարի 12-ին այն այցելուներ չի ընդունի:
«Հարգելի՛ այցելուներ, գործադուլի պատճառով Լուվրն այսօր փակ է։ Այն անձանց, ովքեր տոմսեր են ամրագրել թանգարանի տոմսարկղից օրվա ընթացքում այցելելու համար, տոմսերի արժեքը կվերադարձվի ավտոմատ կերպով, որևէ լրացուցիչ գործողություն չի պահանջվում»,- ասված է Լուվրի կայքում տեղադրված հայտարարության մեջ։
Ինչպես հստակեցնում է Agence France-Presse-ը, գործադուլը շարունակելու որոշումը կայացվել է թանգարանի առաջատար արհմիությունների կողմից հունվարի 12-ի առավոտյան տեղի ունեցած ժողովի ժամանակ։ Նրանք անբավարար են համարել Մշակույթի նախարարության և Լուվրի տնօրինության հետ ընթացիկ խնդիրների քննարկման առաջընթացը։ Սա արդեն ութերորդ դեպքն է, երբ մշակութային հաստատության աշխատակիցները գործադուլ են անում՝ պահանջելով աշխատանքային պայմանների և թանգարանի կառավարման մեթոդների բարելավում, ինչպես նաև անհամաձայնություն հայտնելով թանգարանի ներկայիս վարչակազմի վարվող քաղաքականությանը։ Այսպիսով, թանգարանը փակ կլինի այցելուների համար առնվազն մինչև հունվարի 14-ը՝ հաշվի առնելով, որ երեքշաբթի օրերին այն չի աշխատում։
Լուվրի աշխատակիցների գործադուլը սկսվել է դեկտեմբերի 15-ին, երբ շուրջ 400 աշխատակից միաձայն կողմ է արտահայտվել այս միջոցի կիրառմանը։ Այն ժամանակ թանգարանը նույնպես փակվել է երկու օրով։ Դեկտեմբերի 17-ին թանգարանը վերսկսել է այցելուների ընդունումը, սակայն սահմանափակ ռեժիմով։ Դեկտեմբերի 19-ին աշխատակիցները դադարեցրել են գործադուլը՝ դադար վերցնելով Սուրբ Ծննդյան և Ամանորի տոների ընթացքում, սակայն հունվարի 5-ին նրանք կրկին որոշում են կայացրել վերսկսել բողոքի ակցիաները։
Աշխատողները բողոքում են թանգարանի կառավարման մեթոդների դեմ, հատկապես վերջին ամիսների մի շարք բացասական իրադարձությունների ֆոնին, ներառյալ հոկտեմբերին Ապոլլոնի պատկերասրահի կողոպուտը: Աշխատակիցներն իրենց դժգոհությունն են հայտնում այն փաստի կապակցությամբ, որ թանգարանի տարածքները փակվում են սահմանված աշխատանքային ժամերից զգալիորեն ուշ՝ կադրերի պակասի, տեխնիկական խնդիրների և շենքի ընդհանուր վիճակի պատճառով: Միևնույն ժամանակ, նրանք բախվում են «աշխատանքային ծանրաբեռնվածության աճին, կառավարման գնալով ավելի կոշտ մեթոդներին և հակասական հրահանգներին, որոնք խանգարում են նրանց հանգիստ և արդյունավետ ծառայություններ մատուցել» այցելուներին: Այս կապակցությամբ արհմիությունները մտադիր են «ռազմավարական ճնշում գործադրել» թանգարանի տնօրինության վրա՝ փոփոխությունների հասնելու համար։
