Նախորդ շաբաթ ՀՅԴ Հայաստանի Գերագույն մարմնի անդամ, ՀՀ ԱԺ պատգամավոր Թադևոս Ավետիսյանը և ՀՀ ԱԺ պատգամավոր Արման Ղազարյանը այցելել են Մարտունու խոշորացված համայնք։ Պատգամավորները հանդիպել են համայնքի տարբեր բնակավայրերի երկու տասնյակից ավելի քաղաքացիների հետ։
Համատեղ քննարկել են համայնքային կյանքին վերաբերող տարաբնույթ հարցեր։
Բնակիչները բարձրացրել են գյուղատնտեսական չլուծվող կոնկրետ խնդիրներ, սոցիալական բազմաթիվ հարցեր, որոնց հետ իրենք և իրենց ընտանիքներն ամեն օր առերեսվում են։
Շարունակվում է առարկայական դժգոհությունը գյուղատնտեսական առկա խնդիրներին ոչ համարժեք և չթիրախավորված պետական աջակցությունից։
Ձեռք է բերվել պայմանավորվածություն առաջիկայում այցելելու համայնքի գյուղական կոնկրետ բնակավայրեր, նաև տեղերում ծանոթանալ առկա խնդիրներին։
