«Կազուս է ստացվում՝ գալիս է կառավարիչ պետության կողմից նշանակված, ինքը աշխատելու է, Սամվել Կարապետյանը որպես սեփականատեր պատասխան է տալու»։ Այս մասին լրագրողների հետ զրույցում հայտարարեց ՀԷՑ տնօրենի ժամանակավոր պաշտոնակատար Դավիթ Ղազինյանը։

Պատասխանելով հարցին, թե ինչպես են աշխատելու նորանշանակ կառավարիչի հետ, Ղազինյանը հայտնեց, որ իրենք շարունակելու են աշխատել ի բարօրություն ժողովրդի ու պաշտպանելով ընկերության շահերը։

Պատասխանելով լրագրողի հարցին՝ մտավախություններ ունե՞ն, որ կլինեն աշխատակիցներ, ովքեր կհեռացվեն աշխատանքից, հաշվի առնելով այն հանգամանքը, որ դեռևս մեկ ամիս առաջ էր Նիկոլ Փաշինյանը սպառնացել աշխատանքից ազատել և իրավական գործընացներ սկսել նրանց նկատմամբ, ովքեր աշխատակիցներն «կստիպեն» մասնակցել ի աջակցություն Սամվել Կարապետյանի իրականացվող ցույցերին։

«Իշխանական լրատվամիջոցներում հեռախոսային խոսակցություններ էին տարածվել, բայց եթե այդ ձայնագրություններում գոնե 0.1 տոկոս ապացույց լիներ, իրենց արածն արած կլինեին։ Կարծում եմ՝ առաջին հերթին դա ինձ է վերաբերվել։ Անկեղծ ասած, չեմ վախենում։ Հիմա այնպիսի հարգարժան մարդիկ են կալանավայրում նստած, որ ստացվում է՝ չնստելն է ամոթ։ Մենք չենք վախենում, որովհետև հավատքի և որևէ մեկի նկատմամբ վատ բան չենք արել։ Բացի այդ, իրավական պրոցես չկա։ Եթե իրավական պրոցես լիներ, Սամվել Կարապետյանն ուղղակի կալանավայրում չէր լինի։ Մի արտահայտության համար միայն... ես էլ եմ հիմա ասում՝ մեր ձևով մնալու ենք այստեղ։ Սամվել Կարապետյանի բոլոր խոսքերի տակ ստորագրում եմ»,–ասաց Ղազինյանը։