Գազայի կենտրոնում ջուր բաժանող կետի վրա իրականացված իսրայելական օդային հարվածի հետևանքով զոհվել է առնվազն վեց երեխա և ևս չորս քաղաքացիական անձ, հայտնում են բժիշկները։ Տեսանյութերում երևում են արյունլվա երեխաներ և ջրի տարաներ՝ հարվածից հետո ստեղծված քաոսային միջավայրում։ Իսրայելի բանակը հաստատել է, որ հարվածը նախատեսված էր «Իսլամական ջիհադի» անդամի դեմ, սակայն զինամթերքը «նկատելիորեն շեղվել է թիրախից»։ Հարվածի հետևանքով զոհվել է նաև Գազայի հայտնի բժիշկներից մեկը։
Այս իրադարձությունները տեղի են ունենում Դոհայում ընթացող զինադադարի բանակցությունների ընթացքում, որոնք, ըստ ՀԱՄԱՍ-ի և իսրայելական աղբյուրների, մտել են փակուղի՝ բանակի վերադասավորման քարտեզների հարցում լուրջ տարաձայնությունների պատճառով։ ԱՄՆ հատուկ բանագնացը շարունակում է հույս հայտնել, սակայն ՀԱՄԱՍ-ը պնդում է՝ Իսրայելը նոր պայմաններ է առաջ քաշում։
Միևնույն ժամանակ, ՄԱԿ-ի և Կարմիր խաչի տվյալներով, վերջին շաբաթներին մոտ 800 պաղեստինցի է զոհվել հումանիտար օգնության հասանելիության փորձի ընթացքում։ Գազայի առողջապահական համակարգը քայքայման եզրին է։ Իսկ Իսրայելի ներսում հասարակական կարծիքը պահանջում է պատերազմը դադարեցնել գերիների վերադարձի դիմաց։ Սակայն վարչապետ Նեթանյահուն մնում է անզիջում՝ հայտարարելով, որ պարտադիր է ոչնչացնել ՀԱՄԱՍ-ը և վերացնել Գազայի սպառնալիքը, գրում է CNN-ը։
