«Քաղաքացիական պայմանագիր» խմբակցությունում Հովիկ Աղազարյանին հեռացնելու կամ մանդատից զրկելու պրոցեսներ չկան։ Այս մասին լրագրողներին ասել է ՔՊ պատգամավոր Գագիկ Մելքոնյանը։  «Չեմ կարծում, որ խմբակցությունը կարող է նման քայլի գնալ։ Աղազարյանն էլ ժամանակ է խնդրել, կարծում եմ՝ մոտ ժամանակահատվածում կարձագանքի վարչապետի խնդրանքին։ Դեմոկրատական երկիր է, մեր մոտ էլ՝ անգամ խմբակցության ներսում, շատ քննադատություններ կան իրար նկատմամբ»,- նշել է Մելքոնյանը։

Ստացվում է, որ դեմոկրատական երկրում վարչապետը նամակագրությամբ կարող է պատգամավորին խնդրել մանդատը վայր դնել, ԱԺ նախագահը սպառնա, որ ժողովրդի կողմից, ընտրությամբ ստացված մանդատը վայր դնի, մյուս գործընկերները ճնշում գործադրեն, ասեն մանդատդ դիր ու շարունակեն ասել, թե ժողովրդակարական են։ ՔՊ-ի ժողովրդավարությունը մի քիչ այլ է։ Երևի պետք է ձևակերպումներ ու սահմանումներ տալ։ Օրինակ դժվար է պատկերացնել, որ ժողովրդավար ԱՄՆ-ում կամ բռնապետական Հյուսիսային Կորեայում երկրի ղեկավարը նամակագրությամբ աշխատանքից ազատի օրինակ անկախ դատական համակարգի ղեկավարին։ ԲԴԽ նախագահն իշխանության ճյուղերից մեկի՝ դատական իշխանության ներկայացուցիչն է, ում ոչ վարչապետն իրավունք ունի նշանակելու և ոչ էլ՝ ազատելու։ Ավելին՝ կոռեկտ չէ, որ սոցիալական ցանցերով ուղիղ շփումներ ունենան։ ԱՄՆ ընտրված նախագահ Թրամփը անցում էր քրեական գործով և հնարավոր է, ԱՄՆ համապատասխան պաշտոնյան, ում Փաշինյանը ՀՀ-ում նամակով աշխատանքից ազատում է, ԱՄՆ-ում կալանավորեր Թրամփին։

Մելքոնյանի հարցազրույցում մեկ այլ շատ կարևոր միտք կա։ Հարցին, թե ինքը կդնե՞ր մանդատը, եթե վարչապետն իրեն «խնդրեր»՝ Մելքոնյանը պատասխանել է. «անպայման, 5 րոպե էլ չէի մտածի»։ Դե իհարկե, այստեղ Հռոմի պապուց ավելի կաթոլիկ լինելու անհագ ցանկություն կա։ Բացի այդ՝ ևս մի միջոց է ընկերոջ հաշվին ինքնահաստատվելու։ Փաշինյանը, երբ նախկին իշխանության դավանափոխներին իր թիմ էր ընդունում, պետք է սպասի, որ մի օր էլ՝ նոր դավանանքի հայտնվելու դեպքում, կրկին ճամբար են փոխելու։