Կառավարությունն իր այսօրվա նիստում հավանություն տվեց «Հայաստանի Հանրապետության օրհներգի մասին» օրենքում փոփոխությունների նախագծին: Նախագծով առաջարկվում է կարգավորել օրհներգի, ինչպես նաև օրհներգի կատարման հետ կապված որոշ հարաբերություններ: Առաջարկվում է սահմանել օրհներգի մեկ պաշտոնական տարբերակ:

Նախագծով ՀՀ կառավարությանը լիազորություն է տրվում վերոնշյալ օրենքի հավելվածի տեքստին և վերահսկությանը համապատասխան սահմանել Հայաստանի Հանրապետության օրենքի կարճ խմբագրության տարբերակ։

«Իմ վարչապետության ընթացքում մինչև X պահը, պաշտոնական միջոցառումների ժամանակ, երբ հիմնը հնչում է, ես ուշադիր եմ, և շատ երկար ժամանակ ես չեմ հանդիպել ՀՀ օրհներգի նույն ձևի կատարման։ Չկա արագության ստանդարտ, այս տեմպի ստանդարտ, ընդհանրապես տևողության ստանդարտ, հնչողության ստանդարտ, ընդհանրապես տեխնիկական պարամետրերի ստանդարտ»,- անդրադառնալով վերոնշյալին ասել է Փաշինյանը:

«Մենք, օրինակ, որևէ միջոցառման կազմակերպման ընթացքում ջրին, գինուն, բաստուրմային, սուջուխին ավելի մեծ նշանակություն և ուշադրություն ենք հրավիրում, քան օրհներգին, որովհետև օրհներգը ի՞նչ, YouTube-ում հազար հատ օրհներգ կա, մտնում ես, գրում ես Հայաստանի օրհներգ, օրհներգը հնչում է։ Եվ իմ անձնական փորձը այն է եղել, որ երբեք որևէ մեկը իրեն հարց չի տվել՝ լսեք, բա ի՞նչ օրհներգ է հնչելու, ո՞նց է հնչելու։ Սա մի ֆունդամենտալ խնդիր է, որը այս նախագծով մենք պիտի լուծենք»,- ասել է նա:

Վարչապետը, ինչպես միշտ ցանկացած  օրինակ  բերում է սննդից և ամեն ինչ կապում է ուտելու հետ։ Ի վերջո որքանո՞վ է տեղին Հայաստանի Հանրապետության պետական խորհրդանիշերց մեկը համեմատել բաստուրմայի և սուջուխի հետ։ Սա, իհարկե, անարգանք է նախ պաշտոնի հանդեպ, որը զբաղեցվում է, ապա պետության և հետո էլ այդ խորհրդանիշերի հանդեպ հարգանք ունեցող քաղաքացիների նկատմամբ։

Մյուս ավելի լուրջ խնդիրն այն է, որ օրհներգի տարբեր կատարումները կարելի է համարել սխալ, իսկ խմբագրված տարբերակը կիրառելի։ Այդ նույն կենցաղային մոտեցմամբ՝ ստացվում է, որ օրհներգը, որի տևողությունը 3-5 րոպե է, պետք է խմբագրվի, քանի որ այդ միջոցառումներին այդքան ժամանակ չեն կարող  տրամադրել օրեներգն ամբողջությամբ լսելուն։ Խմբագրված օրհներգ ունենալն այլ բացատորություն չի կարող ունենալ։

Ավելի խնդրահարույց է, երբ նախագծով հնարավորություն է տրվում փոխել օրհներգի տեքստը։ Կարևոր է հիշել, որ արդեն տևական ժամանակ է՝ ԱԺ նախագահ Ալեն Սիմոնյանը հայտարարում է, որ օրհներգի նոր նախագիծ է բերելու ԱԺ, իսկ վերջերս խոսում էր արդեն դրա պատրաստ լինելու մասին։ Տեսնես օրհներգում ի՞նչ կա, որ խանգարում է «Խաղաղության պայմանագիր» կոչվածին։