Երբ Փաշինյանը քաղաքում մի տեղ հայտնվում է, կրպակավաճառները, մանր առևտրով զբաղվողներն իրար գրում են՝ ձեր տարածքի դռները փակեք, մի երկու ժամով անհետացեք։ Այս մահաբեր իշխանության թիրախում արդեն 18 տարեկաններն են, երբ 5000-ից ավելի 18 տարեկաններ Եռաբլուրում են։ Մենք տեսանք, թե ինչպիսի հետևողական դաժանությամբ այս ռեժիմը պատժեց երկու եղբայրների, որոնց ամեն կիրակի կարելի էր տեսնել Սուրբ Աննա եկեղեցում՝ աղոթագիրքը ձեռքներին՝ աղոթք անելիս։ 168TV-ի «#ՕրաԽնդիր» հաղորդման ժամանակ նման կարծիք հայտնեց ՀՀ ԱԺ նախկին պատգամավոր Նաիրա Զոհրաբյանը։
«Ֆաս հրամանով այս ռեժիմի բոլոր ներկայացուցիչները՝ կոկորդիլոսի ձվի մասնագետից մինչև շարքային ուսապարկ, թիրախավորել էին այդ 18 տարեկան երեխաներին։ Զարհուրելի է, երբ խրախճանք են անում, գրում՝ Դավիթն իր «Վերջին զանգը» կնշի բանտում։ Նիկոլը վաղը կամ մյուս օրը գնալու է, նա հավերժ չէ, բայց այս ատելությունը մտահոգիչ է։ Ինչպիսի նողկալի հայհոյանքներ էին գրում 18 տարեկան Դավթի՝ ուշագնաց լինելու կադրի տակ։ Մենք, ցավոք սրտի, հասարակության մեջ ունենք մի սեգմենտ, որին բացի կենդանի ասելուց՝ ուրիշ բան չես կարող ասել»,- ասաց քաղաքական գործիչը։
Ընդդիմադիր գործչի կարծիքով՝ այս ամոթալի դատավարությունը հիշեցնում է «Խաղալիք» ֆիլմը, երբ կերպարներից մեկը մյուսին ասում է՝ շալվարդ իջեցրու, և շարունակում՝ հիմա ո՞վ է ավելի զարհուրելի՝ ե՞ս, որ ասում եմ՝ իջեցրու, թե՞ իջեցնողը․
«Նիկոլը դատավոր Մնացական Մարտիրոսյանին ժամանակին ասում էր «տխրահռչակ խամաճիկ Մացո»։ Այդ նույն Մացոն Նիկոլին դատապարտել էր յոթ տարվա ազատազրկման, այդ նա էր, որ երբ դատարանի դահլիճում մահացավ Արմեն Գրիգորյանը, և երբ անգամ դատական կատարածուներն էին իրար խառնվել, Մացոն անտարբեր նայեց իր աչքի առջև մեռնող Արմեն Գրիգորյանին, սեղանից շատ հանգիստ վերցրեց իր թղթապանակը, դրեց թևի տակ և անգամ գլուխը չթեքեց՝ նայելու՝ Արմեն Գրիգորյանը մահացա՞վ, թե՞ ոչ։ Ամենազարհուրելին այն է, որ անգամ Արմեն Գրիգորյանի մահից հետո Մացոն Արմեն Գրիգորյանին ճանաչեց մեղավոր»:
