Կառավարության նիստում այսօր վարչապետ Փաշինյանը կրկին բնակչությանը պատրաստեց նոր զիջումների, իսկ չզիջելու դեպքում կրկին սպառնաց նոր էսկալացիայով։   «Մենք որդեգրել ենք սկզբունք, որ սահմանն անցնում է այն տեղով, որտեղով անցնում է: Սա շատ կարևոր սկզբունք է, որովհետև եթե մենք գնայինք այն տրամաբանությամբ, որ այս սկզբունքից շեղվելով պետք է նոր սահմանագիծ ստեղծենք, դա կնշանակեր, որ ստեղծում ենք էսկալացիայի և ռազմական բախումների հարատև աղբյուր»,-ասաց նա:

Սա շատ պարզ ուղերձ է, որ դեմարկացիայի և դելիմիտացիայի արդյունքում Ադրբեջանը դուրս չի գալու ՀՀ օկուպացված տարածքներից, հակառակ դեպքում պատերազմ է լինելու։ Վարչապետը կրկին շեշտում է, որ այս հերթական զիճումը էլի չի բացառում էսկալացիան, այլ՝ պարզապես նվազեցնում է դրա հավանականությունը և վերջ։

Ի վերջո, սա հայտարարում է երկրի մի ղեկավար, ով այս արտահայտությունից րոպեներ առաջ ասում էր, որ սահմանզատում և սահմանագծում է տեղի ունենում սովետական ամենավերիջին քարտեզի հիման վրա։ Օրեր առաջ էլ գործընթացը տեղի էր ունենում Ալմա-Աթայի հռչակագրի հիման վրա, ամիսներ առաջ փաթեթային լուծամն մասին էր խոսում և այլն։

Բայց այս ամենի կողքին կան նաև հակառակ կողմի՝ թշնամու, հայտարարությունները, որոնք, որքան էլ անընդունելի են, միևնույն է՝ չես անտեսի։ Ըստ Ադրբեջանի նախագահի՝ գործընթացը տեղի է ունենում Ադրբեջանի կողմից պատրաստված փաստաթղթերի հիման վրա։ Իսկ ՀՀ վարչապետի խոսույթը փոխվում է ամենօրյա ռեժիմով։

Անկախ Փշինյանի գնահատականից՝ Ադրբեջանը չի ճանաչում ՀՀ տարածքային ամբոջականությունը և երբեք դրա մասին չի հայտարարել։ Թշնամի պետությունը  գործընթացը տանում է ուժի սպառնալիքով ու չի թաքցնում դա։ Այդ նույն սպառնալիքը ՀՀ-ի քաղաքացիներին փոխանցվում է հենց ՀՀ վարչապետի շուրթերով։

Այսօր, նույն նիստի ժամանակ վարչապետն իրականությանը չհամապատասխանող ևս մի հայտարարություն արեց՝ նշելով, որ Տավուշի սահմանզատումը մի բան էլ ավելի բարվոք է դարձրել ՀՀ այդ հատվածի վիճակը՝ մինչդեռ հենց հիմա կիրանցիներին իրենց տների դիմաց փոխհատուցում են առաջարկում իսկ նրանք հրաժարվում են վերցնել այդ գումարը։ Գյուղում նորից լարված իրավիճակ է։