Ադրբեջանի կողմից Արցախի շրջափակումը՝ Լաչինի միջանցքի փակումը, միայն հայ ժողովրդի խնդիրը չէ, այն ամբողջ քաղաքակիրթ ու առաջադեմ աշխարհի խնդիրն է:Այս մասին շեշտեց Արցախի Հանրապետության արտաքին գործերի նորանշանակ նախարար Սերգեյ Ղազարյանը «Շրջափակման մեկ ամիս» խորագրով Ստեփանակերտ-Երևան տեսակամուրջի ընթացքում: Նախ անդրադառնալով շրջափակման պատճառով Արցախ վերադառնալ չկարողացող քաղաքացիներին, որոնք այս պահին Հայաստանում են՝ ԱԳ նախարարն ասաց, որ և Հայաստանում Արցախի մշտական ներկայացուցչությունը, և բազմաթիվ գործընկեր կառույցներ արձագանքել են նրանց խնդիրներին: Արցախ վերադառնալ չկարողացող քաղաքացիները հիմնականում տեղակայված են Գորիսում, նաև՝ Երևանում: ԱԳ նախարարի խոսքով՝ ՀՀ կառավարության կողմից ստեղծված աշխատանքային խմբի հետ ակտիվ աշխատանք Է ընթանում նրանց խնդիրները լուծելու մասով: Խոսելով միջազգային արձագանքից՝ Ղազարյանը հիշեցրեց դեկտեմբերի 20-ի ՀՀ դիմումի համաձայն ՄԱԿ ԱԽ հրավիրված հրատապ նիստը, որտեղ հնչել են կոնկրետ հասցեական դիրքորոշումներ՝ ուղղված Ադրբեջանին, որ դադարեցվի շրջափակումը: