2023 թվականին էականորեն կավելանան մինչև 2 տարեկան երեխայի նպաստի գծով ծախսերը, Ազգային ժողովում 2023 թվականի պետական բյուջեի նախագծի քննարկման ժամանակ ասաց ՀՀ աշխատանքի և սոցիալական հարցերի նախարար Նարեկ Մկրտչյանը:
«2023 թվականի համար այս միջոցառման գծով ծախսերը նախատեսվել են 20 միլիարդ 350 միլիոն դրամի չափով», - նշեց նախարարը:
Նրա խոսքով՝ 2023 թվականի հունվարի 1-ից հետո ծնված երեխաների համար մինչև երկու տարեկան երեխայի խնամքի նպաստ կնշանակվի բոլոր մայրերին՝ անկախ նրանց հաշվառման բնակության վայրից: Արդյունքում՝ շահառուների թիվը կավելանա ի հաշիվ չաշխատող քաղաքաբնակ, ինչպես նաև վարձու աշխատող հանդիսացող, բայց խնամքի արձակուրդում չգտնվող մայրերին:
«Նախատեսվում է, որ խնամքի արձակուրդում գտնվողի դեպքում նպաստի չափը հաշվարկվելու է նվազագույն աշխատավարձի նկատմամբ կառավարության սահմանած տոկոսից, իսկ չաշխատող կամ վարձու աշխատող հանդիսացող, բայց խնամքի արձակուրդում չգտնվող մայրերի դեպքում՝ խնամքի արձակուրդում գտնվողի համար սահմանված գումարի 80 տոկոսը չգերազանցող չափով», - մանրամասնեց նախարարը:
Գյուղաբնակ ու միաժամանակ խնամքի արձակուրդում գտնվող ծնողին խնամքի նպաստ կվճարվի նշված երկու գումարների հանրագումարի չափով:
«Նպաստի չափը 2023 թվականի հունվարից կսահմանվի 37 հազար 500 դրամ՝ 2023 թվականի հունվարի 1-ից հետո ծնված երեխաների աշխատող ու խնամքի արձակուրդում գտնվողների համար, իսկ մյուս դեպքում՝ 31 հազար 600 դրամ», - ասաց Մկրտչյանը:
Գյուղական բնակավայրում աշխատող ու խնամքի արձակուդում գտնվող ծնողը կստանա 69 հազար 100 դրամ, իսկ մինչ 2023 թվականին ծնվածների մասով՝ 63 հազար 200 դրամ:
