Թեև շուրջ 8-9 ամիս
(համենայն դեպս՝ Մեղրիի համայնքապետն է այդպես
ասում) Մեղրի-Ագարակ ճանապարհին ռուս սահմանապահները անցակետ են դրել, բայց այսօր թեման
կրկին շիկացել է և լրատվականնրը Մեղրիի համայնքապետից բացատրություններ են պահանջում:
Բնական է, որ Բագրատ Զաքարյանը (Մեղրիի համայնքապետ)
պետք է ասի այն, ինչ իրեն, պատկերավոր ասած,
գրել-տվել են Երևանից: Բայց գրեթե բոլոր լրատվականներին, այդ թվում և Vesti.am-ի լրագրողին Բագրատ Զաքարյանը հայտնել է, որ ռուս սահմանապահների գործողություններն
օրինաչափ են: Միաժամանակ Մեղրիի համայնքապետը ասել է, որ այս գործողություններն «այլ
տեսանկյունից են դիտարկվում»՝ ելնելով քաղաքական իրավիճակից: Հետաքրքիր
է, որ իր մեկնաբանություններում Բագրատ Զաքարյանը մի շարք լրատվամիջոցների հայտնել
է, թե առայժմ համայնքում անվտանգային խնդիրներ չկան: Մասնավորապես
Vesti.am-ի հետ զրույցում նա նաև
ասել է. «Չգիտե՞ք, որ մեծ քաղաքականության
արդյունքում ներկա պահին ճանապարհների,
սահմանների խնդիր է լուծվում»: Ի՞նչ է ակնարկում Մեղրիի համայնքապետը,
երբ խնդրո առարկա ճանապարհահատվածը ՀՀ ներպետական ճանապարհ է, չի շոշափվում հայ-ադրբեջանական,
հայ-ռուս-ադրբեջանական կամ միչև այժմ հայտնի որևէ այլ փաստաթղթում, որով ճանապարհների
կամ սահմանների հարց է քննարկվել կամ դրվել: Մեղրի-Ագարակ ավտոճանապարհն անցնում է
հայ-իրանական սահմանին զուգահեռ և մինչև հիմա ո՛չ իրանական, ո՛չ էլ հայկական կողմից
այդ սահմանագծի փոփոխության հարց չի բարձրացվել: Ավելին՝ իրանական կողմը բազմիցս հայտարարել
է, որ Հայաստան-Իրան սահմանագիծն իր համար «կարմիր գիծ» է և թուլ չի տա դրա փոփոխություն:
Հաշվի առնելով Հայաստանի
և Ադրբեջնի միջև սահմանային «բանավոր ըմբռնումների» կասկածելի պրակտիկան՝ չի բացառվում,
որ հայ-իրանական հարաբերություններում սահմանային կամ ճանապարհային խնդիրներ չլինեն,
բայց այլ ձևաչափում դրանք քննարկվում են: Գուցե դա՞ է պատճառը, որ Մեղրիի համայնքապետը
բազմանշանակ հայտարարում է, որ առայժմ
անվտանգային խնդիրներ չկան և, չգիտես ինչու, հիշեցնում է մեծ քաղաքականության, ճանապարհների
և սահմանների մասին:
Հանուն օբյեկտիվության
նշենք, որ մի շարք լրատվականների հարցերից հետո՝ News.am-ի
հետ զրույցում Մեղրիի համայնքապետն ակնարկել է, որ «այդ
սահմանային գոտում սահմանահատումներ են լինում»: Հավանաբար համապատասխան կենտրոնից
հուշել են, թե ինչով սվաղի կամ արդարացնի իր «առայժմ»-ը և «մեծ քաղաքականության արդյունքում»-ը:
