Արդյունաբերության ոլորտում ներդրողները, որոնք ցանկանում են կառուցել նոր գործարաններ, աջակցության նոր սխեմա կստանան պետությունից։ Դա ենթակառուցվածք է՝ ներդրումների դիմաց։ Այս մասին հուլիսի 22-ին «Հայաստանում գործարար միջավայրի բարելավում» USAID ծրագրի կողմից մշակված ներդրումային բարեփոխումների ճանապարհային քարտեզի շնորհանդեսից հետո լրագրողների հետ զրույցում ասաց էկոնոմիկայի նախարար Վահան Քերոբյանը։
Նախագիծը, նրա խոսքով, արդեն քննարկվում է միջգերատեսչական մակարդակով եւ պետք է ներկայացվի ու ընդունվի կառավարության առաջիկա նիստում։ Ավելին, միջգերատեսչական մակարդակով ձեռք է բերվել սկզբունքային համաձայնություն։
«Շուտով կներկայացնենք մանրամասները։ Խոսքը, մասնավորապես, այն մասին է, թե ինչ պայմաններով եւ ինչպիսի ենթակառուցվածք կարող է ստանալ ներդրողը։ Հիշեցնեմ, որ խոսքը արդյունաբերական ներդրողների մասին է»,- ասաց նախարարը։
