ՌԴ պաշտպանության նախարարության Միջազգային հակաականային կենտրոնի մասնագետները շարունակում են ականազերծման աշխատանքները ԼՂ տարածքում։ Ռուսական խաղաղապահ ուժերի ինժեներական ստորաբաժանումներն ավարտում են Ստեփանակերտի հյուսիսային արվարձանների ականազերծումը, հաղորդում է ՌԴ ՊՆ-ն։
Ռուս խաղաղապահները Լեռնային Ղարաբաղում արդեն ականազերծել են 274 հեկտար տարածք, շուրջ 105 կմ ճանապարհ, 451 շենք-շինություն։ Հայտնաբերվել և ոչնչացվել է ավելի քան 8700 պայթյունավտանգ առարկա։
Գերատեսչությունը նաև հաղորդում է, որ ականազերծման ընթացքում ռուս խաղաղապահներն օգտագործում են ժամանակակից ռոբոտատեխնիկական համալիրներ, որոնք թույլ են տալիս պահպանել ականազերծման բարձր տեմպը լեռնային տեղանքի և վատ եղանակի պայմաններում։
Գերատեսչությունը հավելում է, որ հայտնաբերված պայթյունավտանգ առարկաները և չպայթած զինամթերքը դուրս են բերվում և ոչնչացվում հատուկ սարքավորված զորավարժարանում։ Այն զինամթերքները, որոնք հնարավոր չէ տարհանել, ոչնչացվում են տեղում՝ պահպանելով անվտանգության բոլոր միջոցառումները։
