Շվեդիայի հավաքականի նախկին հարձակվող Զլատան Իբրահիմովիչն ու Անգլիայի հավաքականի նախկին կիսապաշտպան Դևիդ Բեքհեմը գրազ են եկել ԱԱ-2018-ի քառորդ եզրափակչի` այս թիմերի միջև կայանալիք խաղի արդյունքի վրա: Այդ մասին տեղեկանում ենք Իբրահիմովիչի և Բեքհեմի սոցցանցային խոսակցության լուսանկարից, որն Instagram-ի իր էջում հրապարակել է Իբահիմովիչը:
«Հեյ, Դևիդ Բեքհեմ: Եթե Անգլիայի հավաքականը հաղթի Շվեդիային, ապա քեզ կհրավիրեմ ընթրիքի աշխարհի ցանկացած կետում:
Իսկ եթե հաղթի Շվեդիան, ապա դու ինձ համար կգնես այն ամենն, ինչ ցանկանամ «Ikea» խանութից, լա՞վ»,- դիմել է Բեքհեմին Իբրահիմովիչը «Instagram»-ում:
«Եթե Շվեդիան հաղթի, ես անձամբ քեզ կտանեմ «Ikea» և կգնեմ այն ամենն, ինչ կցանկանաս Լոս-Անջելեսի քո նոր առանձնատան համար:
Բայց եթե Անգլիան հաղթի Շվեդիային, ցանկանում եմ, որ դու Անգլիայի հավաքականի մարզաշապիկով գաս վերջինիս խաղին «Ուեմբլի» ստադիոնում և ընդմիջմանը ձուկ և չիփսեր վայելես»,- պատասխանել է Բեքհեմը:
Հիշեցնենք` Շվեդիա-Անգլիա հանդիպումը կկայանա «Սամարա Արենայում» այսօր` հուլիսի 7-ին:
