Foto

Ավինյանն արձագանքել է Աննա Հակոբյանին. «Ժամանակին մարդկանց գրպաններ գնացող գումարները դառնում են բակեր ու փողոցներ»

Երևանի քաղաքապետ Տիգրան Ավինյանն այսօր քաղաքապետարանում անդրադարձավ մայրաքաղաքի խցանումների պատճառներին՝ նշելով, որ դրանք պայմանավորված են նաև ավտոմեքենաների թվի կտրուկ աճով և երթևեկության մշակույթով։ Նա հակադարձեց նորակառույց շենքերի՝ խցանումների պատճառ լինելու մասին տեսակետներին։

Ավինյանի խոսքով՝ 2026 թվականի առաջին 10 ամիսներին մետրոյի ուղևորափոխադրումների թիվը հասել է 23 միլիոնի՝ 2016 թվականի նույն ժամանակահատվածի 12-13 միլիոնի համեմատ։

Քաղաքապետը նշեց, որ 2023 թվականից նոր շինարարությունների համար ներդրված տուրքերի հաշվին քաղաքը ֆինանսական միջոցներ է ստանում, որոնք ուղղվում են ենթակառուցվածքների զարգացմանը։

«2022 թվականից էդ կառուցվող նոր շենքերից Երևան քաղաքն ուղիղ ֆինանսական հետաքրքրություն ունի։ Մասնավորապես՝ հարյուրավոր բակեր, ֆուտբոլի դաշտեր, ճանապարհներ, կոյուղիներ, որոնք քաղաքապետարանը կառուցել է, կառուցել է էն տուրքերով, որոնք սկսել է ներդնել 2023 թվականից՝ էդ շինարարությունների համար։ Թող ինձ ներեն, բայց էն գումարները, որոնք ժամանակին մարդկանց գրպաններ էին գնում, այսօր դառնում են բակեր, մանկապարտեզներ, փողոցներ ու մայթեր, հենց էդ նույն շինարարություններից»,-ասաց Ավինյանը։

Հիշեցնենք, որ օրեր առաջ վարչապետի տիկին Աննա Հակոբյանը ֆեյսբուքյան եթերում դժգոհել էր Երևանի խցանումներից՝ դրանց պատճառների թվում նշելով նաև մայրաքաղաքի շինարարական թույլտվությունները։