Վրաստանում՝ Կվեշեթի-Կոբի մայրուղու վրա՝ դեպի «Լարս» տանող ճանապարհին, ևս մեկ կամուրջ է կառուցվում։ Այս մասին հայտնում է Վրաստանի ավտոճանապարհների դեպարտամենտը։
Կամուրջը սկսվում է կիրճի հատակից, այն ունենալու է ավելի քան 400 մետր երկարություն և 166 մետր բարձրություն։ Տվյալմասշտաբի կամարակապ կամուրջ Վրաստանում չկա։ Կամարի երկու մասերի միացումը նախատեսվում է ավարտել հոկտեմբերի վերջին։
Կվեշեթի-Կոբի նախագծովկկառուցվեն 23 կմ երկարությամբ երկշերտ ասֆալտբետոնե ճանապարհ, հինգ կամուրջ և հինգ թունել, ինչպես նաև կվերակառուցվի գործող մեկ կամուրջ: Հինգ նոր կամուրջներից կառուցման փուլում են գտնվում 4–ը, մեկն արդեն ավարտված է։
Ավարտվել է 9 կմ հիմնական թունելի և նույն երկարությամբ տարհանման թունելի անցման կառուցումը:
Ավարտվել են նաև 1,5 կմ և 500 մ երկարությամբ թունելների անցումն ու երկաթբետոնե երեսպատումը:
Նախագծի իրականացումը թույլ կտա ապահովել անխափան տրանսպորտային հաղորդակցություն դեպի Ռուսաստան, ինչն առանցքային նշանակություն ունի նաև Հայաստանի համար. բեռնահոսքերը կկարողանան շարժվել առանց ձմեռային ժամանակաշրջանին բնորոշ ուշացումների, երբ «Վերին Լարս» տանող ճանապարհը հաճախ փակվում է:
