Բուլղարիան նպատակ ունի 30 ամսվա ընթացքում երկրում կառուցել գերմանական զինամթերք արտադրող Rheinmetall ընկերության գործարան։ Ինչպես «Արմենպրես»-ը տեղեկանում է Բուլղարիայի ազգային լրատվական գործակալությունից (BTA), այս մասին հեռուստատեսային հարցազրույցում հայտնել է Բուլղարիայի փոխվարչապետ և էկոնոմիկայի, ներդրումների ու արդյունաբերության նախարար Ալեքսանդր Պուլևը։
Պուլևը նշել է, որ Rheinmetall-ի ներկայացուցիչների հետ շատ կառուցողական հանդիպումներ է անցկացրել՝ քննարկելով Բուլղարիայի համար ռազմավարական նշանակություն ունեցող գործարքի հիմնական պարամետրերը։ Նրա խոսքով՝ հաջորդ քայլը Բուլղարիայի շահերի պաշտպանությունն է՝ տեխնոլոգիաների լիարժեք փոխանցման միջոցով պաշտպանական արդյունաբերության նախագծերն ու կարողություններն արդիականացնելու նպատակով։
Փոխվարչապետը հավելել է, որ տեղանքի ընտրության հարցը դեռևս լրացուցիչ բանակցությունների և ստուգումների առարկա է։
Վառելիքի գների վերաբերյալ Պուլևը կանխատեսել է անորոշության առնվազն ևս 6-12 ամիս՝ նույնիսկ ԱՄՆ-ի և Իրանի միջև հակամարտության ավարտից հետո՝ հաշվի առնելով էներգիայի արտադրության ենթակառուցվածքների զգալի մասի ոչնչացումը։ Նա նշել է, որ չի կարող որևէ պարտավորություն ստանձնել Բուլղարիայի կառավարության անունից՝ կապված աշխարհաքաղաքական գործոնների հետ, սակայն վերահաստատել է բուլղարացի սպառողների հանդեպ ունեցած հանձնառությունը՝ երաշխավորելով, որ երկիրը կունենա վառելիքի ամենացածր գները Եվրոպայում։
Պուլևը շեշտել է, որ աշխարհաքաղաքական զարգացումները Բուլղարիայի և նրա կառավարության վերահսկողությունից դուրս են։
Պաշտոնյան նաև նշել է, որ 300 միլիոն եվրոյի միջոցառումների ամբողջ փաթեթը նախատեսված է բոլոր բուլղարացի սպառողներին աջակցելու համար: Այն ներառում է աստիճանական միջոցառումների լայն շրջանակ, որոնցից մի քանիսն ուղղված են ամենաաղքատ և ամենախոցելի մարդկանց: Ըստ Պուլևի՝ բացի խոցելի խմբերի համար նախատեսված 30 միլիոն եվրոյից, մնացած միջոցառումներն արդեն իսկ գործում են և օգուտ կբերեն բոլոր բուլղարացի սպառողներին։
«Կառավարությունը շուրջօրյա հետևում է իրավիճակին և պատրաստ է քննարկել հետագա տարբերակներ և արագ ու արդյունավետ կերպով ներդնել դրանք՝ համաշխարհային միտումների զարգացմանը զուգընթաց», - նշել է նա:
Հարցին, թե արդյոք Բուլղարիային սպառնում է վառելիքի պակասուրդ, Պուլևն ասել է, որ «Լուկօյլ»-ը կառավարվում է լավ և պրոֆեսիոնալ կերպով։ Նա հավելել է, որ այն այժմ աշխատում է գրեթե 100% հզորությամբ՝ շնորհիվ առողջ ֆինանսական կառավարման և թափանցիկ ղեկավարման։
