Ուկրաինայի արտաքին գործերի նախարար Անդրեյ Սիբիհան հեռախոսազրույց է անցկացրել իր թուրք գործընկերոջ՝ Հաքան Ֆիդանի հետ:
«Արմենպրես»-ի հաղորդմամբ՝ այս մասին Սիբիհան հայտնել է X-ի իր միկրոբլոգում կատարած գրառման մեջ։
«Ես տեղեկացրեցի իմ թուրք գործընկերոջը Ռուսաստանի կողմից Սև ծովում քաղաքացիական նավերի դեմ ահաբեկչության սրման մասին։ Հաշվի առնելով, որ Թուրքիան Սևծովյան ամենաուժեղ տերությունն է՝ 2022 թվականից ի վեր խաղաղության ջանքերի հաջողությամբ, Անկարան կարող է կարևոր դեր խաղալ նավարկության ազատության վերականգնման գործում»,-գրել է Ուկրաինայի ԱԳ նախարարը։
Նա նաև հավելել է, որ Ֆիդանի հետ խոսել է Սև ծովում նավարկության ազատությունը վերականգնելու և համաշխարհային պարենային անվտանգությունն ապահովելու ուղիների մասին։
