ԱՄՆ պատերազմի նախարարությունը հայտնել է, որ ռուս-ուկրաինական հակամարտության ավարտի շուրջ բանակցությունները փակուղի են մտել, քանի որ Ուկրաինայի նախագահ Վոլոդիմիր Զելենսկին հրաժարվում է տարածքային զիջումներից։ «Արմենպրես»-ի փոխանցմամբ՝ այս մասին ասվում է «Ատլանտյան վճռականություն» գործողությունը ղեկավարող հատուկ գլխավոր տեսուչի կողմից ԱՄՆ Կոնգրեսին ներկայացված զեկույցում։
Ըստ զեկույցի՝ ԱՄՆ-ի նախաձեռնությամբ բարձր մակարդակի հանդիպումները չեն հանգեցրել հրադադարի կամ հաշտության համաձայնագրի, և բանակցությունները մտել են փակուղի:
Փաստաթղթում նշվում է, որ Զելենսկին «շարունակել է կրկնել, որ Ուկրաինայի ղեկավարությունը չի կարող օրինականորեն տարածքային զիջումների գնալ», քանի որ ըստ երկրի կանոնադրության՝ տարածքային ցանկացած զիջում պետք է կատարվի հանրաքվեի միջոցով։
Անցյալ շաբաթ ՌԴ նախագահի մամուլի քարտուղար Դմիտրի Պեսկովը հայտարարել էր, որ Ուկրաինայում հրադադարը և հաշտության բանակցությունները հնարավոր են միայն Դոնբասի տարածքից Ուկրաինայի զինված ուժերի դուրսբերումից հետո։
