Պետական եկամուտների կոմիտեի նախագահ Էդուարդ Հակոբյանը պնդում է, որ վարչապետ Նիկոլ Փաշինյանից որևէ հրահանգ չի ստացել՝ Սամվել Կարապետյանի բիզնեսներում ստուգումներ անցկացնելու համար:
Հարցին՝ Նիկոլ Փաշինյանն ինչպե՞ս կարող է «բոմժ» սարքել Սամվել Կարապետյանին՝ Փաշինյանի կաբինետի ներկայացուցիչը չպատասխանեց:
Էդուարդ Հակոբյանը վստահեցրեց, որ իր ղեկավարման ժամանակ երբևէ հրահանգ չի ստացել որևէ բիզնեսում ստուգումներ իրականացնելու:
«Մեր վարչարարությունն իրականացվում է թիրախային, ռիսկային հիմքերի վրա: Վարչապետի հետ խոսակցություններ լինում են, թե այս կամ այն բիզնեսն ինչ ռիսկեր ունի, ինչ ստվերային ռիսկեր ունի, ինչ հարցեր կան»,- ԱԺ-ում լրագրողների հետ ճեպազրույցում ասաց ՊԵԿ նախագահը:
Հիշեցնենք՝ Նիկոլ Փաշինյանն այսօր հայտարարել էր, թե վախենում է, որ Սամվել Կարապետյանը մինչև տարվա վերջ «միլիարդատերից դառնա բոմժ»։
«Ուժեղ Հայաստան» կուսակցության խորհրդի անդամ Նարեկ Կարապետյանն էլ արձագանքել է Փաշինյանին՝ ասելով․
«Ահա թե ինչ է լինում, երբ հոգով բոմժը դառնում է վարչապետ»։
