Սերբիայի Զրենյանին քաղաքում շարունակվող հունահռոմեական ըմբշամարտի Եվրոպայի Մ-23 առաջնությունում Հայաստանի հավաքականը նվաճեց իր առաջին ոսկե մեդալը: 130 կգ քաշային կարգում փայլուն ելույթներ ունեցավ և մայրցամաքի չեմպիոնի կոչմանն արժանացավ Արամայիս Հարությունյանը: Այս մասին հայտնում է armsport.am-ը:
Եզրափակիչ գոտեմարտում հայ ըմբիշի մրցակիցը բավականին լուրջ տիտղոսակիր էր՝ Մ-20 տարիքայինների աշխարհի չեմպիոն և Եվրոպայի եռակի ոսկե մեդալակիր, հունգարացի Լաշլո Դարաբոշը: Չափազանց համառ ու դիտարժան պայքարում գրանցվեց 1:1 հաշիվը, սակայն լրացուցիչ ցուցանիշների (վերջին արդյունավետ գործողության) շնորհիվ հաղթանակը շնորհվեց Արամայիս Հարությունյանին: Հատկանշական է, որ սա մեր գերծանր քաշային ըմբիշի կարիերայի առաջին միջազգային մեդալն էր, և այն միանգամից ոսկե ստացվեց:
Դեպի եզրափակիչ տանող ճանապարհը ևս տպավորիչ էր. մրցաշարի ընթացքում Հարությունյանը վստահաբար պայքարից դուրս էր թողել ավստրիացի Լեոնարդ Յունգերին (5:0), Ռուսաստանի ներկայացուցիչ Ալեքսանդր Մելեխովին (4:1) և ուկրաինացի Իվան Յանկովսկուն (6:0):
