Բելգիայում Հայաստանի Հանրապետության դեսպան, Եվրամիությունում ՀՀ ներկայացուցիչ Տիգրան Բալայանն ընդունել է ՀՀ պետական տարբեր գերատեսչությունների ներկայացուցիչներից բաղկացած պատվիրակությանը։
«Արմենպրես»-ի փոխանցմամբ՝ այս մասին հայտնում է Բելգիայում ՀՀ դեսպանությունը՝ մանրամասնելով, որ ընդունելությունն իրականացվել է Կոնրադ Ադենաուեր հիմնադրամի (Konrad-Adenauer-Stiftung) Եվրոպայի գրասենյակի կողմից հայաստանյան հանրային ծառայողների համար նախատեսված այցի շրջանակներում։
Դեսպան Բալայանն իր ներածական խոսքում ներկայացրել է ՀՀ-ԵՄ ռազմավարական գործընկերության օրակարգը, վերջինիս իրագործման մեխանիզմները, սպասվող բարձրաստիճան գագաթնաժողովների ուղղությամբ իրականցվող աշխատանքները, ինչպես նաև գործընկերության ընդլայնման հնարավորությունները։
Նշվում է, որ ՀՀ դեսպանն ընդգծել է ԵՄ քաղաքացիական առաքելության կարևորությունը՝ նշելով վերջինիս դերը սահմանային անվտանգության հաստատման գործում։
Խաղաղության ամրապնդման համատեքստում դեսպան Բալայանն առանձնանշել է 2025թ․ օգոստոսի 8-ին ստորագրված վաշինգտոնյան համաձայնությունները՝ նշելով, որ ՀՀ կառավարության «Խաղաղության խաչմերուկ» նախագծի բոլոր դրույթներն արտացոլված են համատեղ հռչակագրում։
Անդրադառնալով ենթակառուցվածքային ծրագրերին՝ դեսպանը նաև ներկայացրել է «Թրամփի ուղի» նախագծի ամբողջական ներուժի գործարկման հնարավորությունները՝ կարևորելով միջազգային գործընկերների աջակցման պատրաստակամությունը։
Տիգրան Բալայանն անդրադարձել է նաև հիբրիդային սպառնալիքների դեմ պայքարին, վիզաների ազատականացման ուղղությամբ իրականացվող աշխատանքին, ինչպես նաև տարածաշրջանային զարգացումներին՝ պատասխանելով ներկաների հարցերին։
