Թաիլանդում առնվազն 32 մարդ է զոհվել, 66-ը՝ վիրավորվել, երբ շինարարական ամբարձիչն ընկել է շարժվող գնացքի վրա։ «Արմենպրես»-ի փոխանցմամբ՝ այս մասին հաղորդում է BBC-ն։
Վիրավորներից 7-ի վիճակը ծայրահեղ ծանր է։
Ամբարձիչը ռելսերից դուրս էր բերել գնացքը՝ իր տակ թողնելով վագոններից մի քանիսը։ Վագոններից մեկում հրդեհ էր բռնկվել։
Պաշտոնյաները հայտնել են, որ վթարի պահին գնացքում եղել է 171 ուղևոր։ Ավելի վաղ հաղորդվել էր, որ գնացքում եղել են 195 ուղևոր և անձնակազմի անդամ։
«Թաիլանդի պետական երկաթուղիները» հետաքննում է միջադեպի պատճառները։ Ընկերությունը հայտարարել է, որ իրավական գործընթաց է սկսում ամբարձիչի համար պատասխանատու շինարարական ընկերության դեմ։
Գնացքում, որն ընթանում էր Բանգկոկ-Ուբոն Ռաթչաթանի երթուղով, հիմնականում եղել են ուսանողներ և աշխատողներ, որոնք դասի կամ աշխատանքի էին մեկնում։
Ավելի վաղ հաղորդվել էր 22 զոհի մասին։
