ՀԱՄԱՍ-ի խոսնակ Հազեմ Կասեմը հայտարարել է, որ ՀԱՄԱՍ-ը հստակ որոշում է կայացրել լուծարել Գազայի հատվածում իր գործերը կառավարող մարմինները՝ ճանապարհ հարթելով Գազայի հատվածի վերահսկողությունն անկախ տեխնոկրատների կոմիտեին փոխանցելու համար։ «Արմենպրես»-ի փոխանցմամբ՝ այս մասին հայտնում է Quds Press-ը։
Խմբավորումը, սակայն, չի հստակեցրել, թե երբ է տեղի ունենալու այդ փոփոխությունը։
ՀԱՄԱՍ-ը չի հայտարարել տեխնոկրատների անունները և դեռևս հայտնի չէ, թե արդյոք նրանք կհաստատվեն Իսրայելի և ԱՄՆ-ի կողմից։
Տեղեկություններ են հաղորդվել, որ Գազայի հրադադարի համաձայնագրի երկրորդ փուլը կհայտարարվի այս ամսվա կեսերին՝ չնայած առկա բազմաթիվ խոչընդոտներին։
Al Jazeera-ի փոխանցմամբ՝ ՀԱՄԱՍ-ի քաղաքական բյուրոյի անդամ Մոհամմադ Նազզալը հայտարարել է, որ շարժման պատվիրակությունը մեկնել է Կահիրե՝ քննարկելու Գազայի հատվածում քաղաքական զարգացումները, ինչպես նաև հետևելու հրադադարի համաձայնագրի իրականացմանը: Նրա խոսքով՝ Կահիրեում քննարկումների առանցքում է Գազայի հատվածը կառավարելու համար տեխնոկրատներից կազմված պաղեստինյան կոմիտեի ստեղծումը:
ՀԱՄԱՍ-ի առաջնորդներից մեկը հայտարարել է, որ պաղեստինյան խմբավորումները նախկինում եգիպտական կողմին ներկայացրել են մոտ 40 անունից բաղկացած ցուցակ, որոնցից մի քանիսն ընտրվել են։
ԱՄՆ նախագահ Դոնալդ Թրամփի գլխավորած միջազգային մարմինը՝ «Խաղաղության խորհուրդը», պետք է վերահսկի Գազայի կառավարության և հոկտեմբերի 10-ին ուժի մեջ մտած հրադադարի այլ ասպեկտները, այդ թվում՝ ՀԱՄԱՍ-ի զինաթափումը և միջազգային անվտանգության ուժերի տեղակայումը:
Եգիպտական կողմն առաջարկել էր ստեղծել անկախ տեխնոկրատներից բաղկացած կոմիտե՝ Գազայի հատվածը կառավարելու համար, որն այդ ժամանակ ողջունվել էր պաղեստինյան խմբակցությունների կողմից։
