Հայաստանի ֆուտբոլի ֆեդերացիայի անունից լեգենդար ֆուտբոլիստի, ԽՍՀՄ հավաքականի կազմում օլիմպիական չեմպիոն, «Արարատի» նախկին գլխավոր մարզիչ Նիկիտա Սիմոնյանի հուղարկավորությանը կմասնակցեն երևանյան թիմի նախկին խաղացողներ Խորեն Հովհաննիսյանը և Սամվել Պետրոսյանը։ Այս մասին Match TV-ին տեղեկացրել են ՀՖՖ-ից։
Սիմոնյանի հոգեհանգիստը տեղի կունենա հինգշաբթի՝ նոյեմբերի 27-ին, Մոսկվայի «Սպարտակի» տնային մարզադաշտում։ Թիմի բոլոր ժամանակների լավագույն ռմբարկուն կհուղարկավորվի Վագանկովսկոյե գերեզմանատանը։
Սիմոնյանի գլխավորությամբ Երևանի «Արարատը» 1973 թվականին դարձել է ԽՍՀՄ չեմպիոն և նվաճել ԽՍՀՄ գավաթը։ Հովհաննիսյանն ու Պետրոսյանը խաղացել են «Արարատում» այն տարիներին, երբ Սիմոնյանը գլխավոր մարզիչն էր։
Բացի այդ, նա «Սպարտակի» կազմում դարձել է ԽՍՀՄ չորսակի չեմպիոն, երկու անգամ՝ ԽՍՀՄ գավաթակիր, և «կարմիր-սպիտակների» լավագույն ռմբարկուն՝ 160 գոլով։ ԽՍՀՄ հավաքականի հետ Մելբուռնում նվաճել է օլիմպիական ոսկե մեդալ։ Որպես մարզիչ՝ նա նվաճել է ԽՍՀՄ երեք առաջնություն և չորս գավաթ։ 1992 թվականից ի վեր զբաղեցնում էր Ռուսաստանի ֆուտբոլային միության առաջին փոխնախագահի պաշտոնը։
Ֆուտբոլում ունեցած մեծ ավանդի համար Սիմոնյանը պարգևատրվել է ՄՕԿ-ի և ՖԻՖԱ-ի շքանշաններով։
