Որքան գիտեմ՝ Հայաստանն ընդունել է Ադրբեջանի առաջարկը, որ Սյունիքի մուտքի և ելքի մոտ՝ ադրբեջանական կողմից, ադրբեջանական անցակետեր կտեղադրվեն, և բոլոր գործողությունները կիրականացնեն Ադրբեջանի մաքսային ծառայողները, որոնք, իբր, տվյալներ կհավաքեն և կփոխանցեն Հայաստանին։ Դրա մասին քաղաքագետ Ստեփան Դանիելյանն հայտարարել է NEWS.am-ի թղթակցի հետ զրույցում։
Նա պարզաբանել է, որ ըստ այդ տվյալների՝ հայ մաքսային ծառայողները այնտեղ որևէ գործողություն չեն ձեռնարկելու։ Ըստ փորձագետի՝ Հայաստանը որևէ վերահսկողություն չի իրականացնելու, որևէ գործողություն չի ձեռնարկելու Հայաստանի տարածքի այդ մասով անցնող ադրբեջանցիների դեմ։ «Դա նշանակում է, որ գործնականում այդ տարածքի նկատմամբ Հայաստանի ինքնիշխանություն չի լինի։ Ընդ որում, Հայաստանի իշխանությունները հավատացնում են, թե երկրի ինքնիշխանությունը պահպանվում է»,- հավելել է փորձագետը։
Նա չի բացառել, որ այդ տարածքում կծառայեն մասնավոր անվտանգության ընկերություններ՝ զինված անձինք ԱՄՆ-ից կամ այլ երկրներից, որոնց մեծ մասը հատուկ ծառայությունների աշխատակիցներ կլինեն։
Դանիելյանը նշել է, որ սահմանի մյուս կողմում տեղակայված է իրանական բանակը, որի թվաքանակն այդ տարածքում ավելանում է։ Նա հիշեցրել է, որ դրան զուգահեռ կա նաև ռուսական ռազմաբազան։ Այդ ամբողջ պատկերը քաղաքագետին հիշեցնում է Սիրիայում տեղի ունեցողը։ «Հայաստանը վաղուց գերտերությունների բախման կենտրոն է դարձել։ Ուրիշ հարց է, թե որքանով դա թեժ փուլ կտեղափոխվի»,- եզրափակել է Ստեփան Դանիելյանը։
