«Կոմսոմոլսկայա պրավդա» թերթի ռազմական թղթակից Ալեքսանդր Կոցը Alpha News-ին տված հարցազրույցում մեկնաբանել է Ռուսաստանի և Ադրբեջանի հարաբերությունները Եկատերինբուրգի իրադարձությունների, Ադրբեջանի կողմից ՆԱՏՕ-ի բազա տեղակայելու հնարավորության վերաբերյալ հայտարարությունների և Նիկոլ Փաշինյանի՝ եկեղեցու դեմ հարձակումների ֆոնին։
Նրա կարծիքով՝ Ռուսաստանն ու Ադրբեջանը դաշնակիցներ են միայն ձևականորեն։
«Ադրբեջանի հետ դաշնակցային հարաբերությունների վերաբերյալ ես գրել եմ և ոչ մեկ անգամ ասել, որ փաստացի դրանք հիմա չկան։ Ընդհանրապես Ադրբեջանի և Ռուսաստանի միջև դաշնակցային հարաբերությունների մասին համաձայնագիրը ստորագրվել է, եթե չեմ սխալվում, հատուկ ռազմական գործողության մեկնարկից մեկ կամ երկու օր առաջ։ Եվ եթե այդ ստորագրումը նշանակված լիներ այն ամսաթվին, որը հաջորդեր հատուկ ռազմական գործողության սկզբին, վստահ եմ, Ալիևն այդ համաձայնագիրը չէր ստորագրի։ Ուստի հիմա նա նա իրեն պահում է այն երկրների պարադիգմայում, որոնք ենթադրում են, թե Ռուսաստանը հարևան պետության տարածքում որևէ մարտական գործողություն իրականացնելու պատճառ չունի։ Վերջին ամիսներին նրա ողջ հռետորաբանությունը խոսում է այն մասին, որ նա որոշ չափով գերագնահատված պատկերացումներ ունի աշխարհաքաղաքական աշխարհում իր նշանակության մասին»,-կարծում է Կոցը։
Նա կարծում է, որ Ռուսաստանում ադրբեջանական սփյուռքը լիովին կարող է կատարել անգլիական հետախուզության հանձնարարությունները։
«Պատմականորեն սփյուռքի, որոշ ազգային ինքնավարությունների միջոցով գործել են համապատասխան հետախուզական կառույցներ։ Հայտնի է, որ Ադրբեջանը շատ սերտ հարաբերություններ ունի բրիտանական MI6 հետախուզության հետ։ Անգլիացիները մեզ վնասում են նաև պատմականորեն, համապատասխանաբար, Ադրբեջանի միջոցով նույնպես կարող էին ինչ-որ կերպ ազդել նույն Ռուսաստանում գտնվող ադրբեջանական սփյուռքի տրամադրությունների վրա։ Մենք հիմա տեսնում ենք Ադրբեջանի միջոցով Ռուսաստանում ազգային հարցը շիկացնելու փորձեր, թեև այն գոյություն չունի»,-ընդգծել է ռազմական թղթակիցը։
Մեր զրուցակիցը զգուշացնում է Ադրբեջանին՝ ՆԱՏՕ-ի բազան իր տարածքում տեղակայելու սպառնալիքների կապակցությամբ՝ նշելով, որ դա սպառնալիք կլինի ռուսական անվտանգության համակարգի համար, և Ռուսաստանն անտարբեր չի մնա։
«Ադրբեջանական ԶԼՄ-ներում արդեն հնչում են սպառնալիքներ այն մասին, որ Բաքուն կարող է ՆԱՏՕ-ի բազա տեղակայել Ռուսաստանի հետ սահմանին, իր տարածքում։ Դա, իհարկե, այդ երկրի ինքնիշխան որոշումն է, բայց հայտնի է, որ ցանկացած օտարերկրյա զորակազմի ցանկացած տեղակայում իր տարածքում արդեն ինքնիշխանության կորուստ է։ Եթե Ադրբեջանը որոշ ԶԼՄ-ների միջոցով ցանկանում է հայտարարել իր ինքնիշխանությունը նվիրելու մասին, ապա՝ առաջ։ Մենք մեր կողմից ստիպված կլինենք արձագանքել դրան։ ՆԱՏՕ-ի բազան Ադրբեջանում, Տաջիկստանում, Ղազախստանում, Ուկրաինայում հարվածում է ոչ թե Ռուսաստանի շահերին, այլ ՌԴ գլոբալ անվտանգությանը»,-զգուշացրել է Alpha News-ի զրուցակիցը։
Անդրադառնալով Նիկոլ Փաշինյանի հարձակումներին Հայ Առաքելական եկեղեցու վրա՝ ռազմական թղթակիցը դրանում տեսնում է անալոգիա Ուկրաինայի հետ և հասարակության պառակտման ռիսկ։
«Դե, ընդհանրապես, կրոնին հարվածելը բավականին վտանգավոր է Փաշինյանի համար, քանի որ նա, հավանաբար, չի սերտել ուկրաինական դասերը, ինչպես, ի դեպ, Իլհամ Ալիևը՝ ՆԱՏՕ-ի բազայի մասին իր հայտարարություններով, ավելի ճիշտ՝ ԶԼՄ-ներում հրապարակումների միջոցով հայտարարություններով, որովհետև դա զուտ ուկրաինական ճանապարհ է։ Ես հիշեցնեմ, որ Ուկրաինայում ի սկզբանե հարվածում էին ազգակցական կապերին, Ռուսաստանի Դաշնության հետ կապերին։ Եվ վերջին թելերը ընդհանրապես կտրելու համար հարվածում էին կրոնին, և դա հանգեցրեց կրոնական պառակտման Ուկրաինայի տարածքում, որտեղ հիմա գոյություն ունի թե՛ կանոնական ուկրաինական ուղղափառ եկեղեցին, թե՛ Ուկրաինայի ոչ կանոնական ուղղափառ եկեղեցին՝ տոմոսի հետ կապված պատմության միջոցով, որը իր ակտիվում գրանցեց Պյոտր Պորոշենկոն։
Եթե Փաշինյանը ցանկանում է գնալ Պորոշենկոյի ճանապարհով, ապա ես նրա համար վատ լուրեր ունեմ։ Որովհետև մարդը, որը կռվում է կրոնի հետ, նա կռվում է իր պատմության, իր անցյալի և իր ժողովրդի հետ։ Իսկ ժողովուրդը դա երկար չի կարող տանել։ Անկեղծ ասած չէի ցանկանա, որ Հայաստանը՝ մեր եղբայրական երկիրը, գնար կրոնական հատկանիշներով հասարակության պառակտման ճանապարհով։ Այդպիսի օրինակներ, ցավոք, աշխարհում եղել են, և դա հանգեցրել է շատ ողբերգական հետևանքների»,-եզրափակել է Ալեքսանդր Կոցը։
