Իրաքի իշխանությունները ձերբակալել են վեց տեղական պաշտոնյաների և ժամանակավորապես աշխատանքից ազատել մի շարք այլ պետական ծառայողների այն բանից հետո, երբ այս շաբաթ ավելի վաղ առևտրի կենտրոնում բռնկված հրդեհի հետևանքով զոհվել է 61 մարդ, հաղորդում է AFP-ն՝ հղում անելով տեղական իշխանություններին։
Հրդեհը, որը բռնկվել է չորեքշաբթի ուշ երեկոյան երկրի արևելքում գտնվող Քութ քաղաքի նորաբաց առևտրի կենտրոնում, դարձել է մահվան ելքով վերջին աղետը մի երկրում, որտեղ անվտանգության կանոնները հաճախ անտեսվում են։
Իրաքի ներքին գործերի նախարարությունը նախնական քննությունից հետո հայտնել է, որ Քութ քաղաքում «մի շարք պաշտոնյաներ և ծառայողներ ցուցաբերել են ակնհայտ անփութություն»։ Քաղաքը գտնվում է Բաղդադից մոտ 160 կիլոմետր հարավ-արևելք։
Երեք տեղական պաշտոնյաներ, ներառյալ Քութ քաղաքում քաղաքացիական պաշտպանության վարչության ղեկավարը, ձերբակալվել են, իսկ 17 աշխատակիցներ ժամանակավորապես ազատվել են աշխատանքից՝ մինչև հետագա ծանուցումը։ Կոռուպցիայի դեմ պայքարի հանձնաժողովը՝ կաշառքի դեմ պայքարող մարմինը, հետագայում հայտնել է, որ անվտանգության ուժերը ևս երեք պաշտոնյայի են ձերբակալել Corniche Hypermarket առևտրի կենտրոնում տեղի ունեցած հրդեհի համար։ Ձերբակալվածների թվում է նաև Քութի համայնքապետարանի իրավախախտումների դեմ պայքարի բաժնի ղեկավարը։
Պաշտոնյաներն ասում են, որ քննությունը շարունակվում է, իսկ ձերբակալվածների թիվը կարող է փոփոխվել։
