Eminem-ի Eight Mile Style հրատարակչական ընկերությունը լայնածավալ դատական հայց է ներկայացրել Meta Platforms տեխնոլոգիական հսկայի դեմ, որին են պատկանում Facebook, Instagram սոցիալական ցանցերը և WhatsApp մեսենջերը։ Ամերիկացի ռեփերի ընկերությունը Մարկ Ցուկերբերգի կորպորացիային մեղադրում է հեղինակային իրավունքների համակարգված խախտման մեջ և պահանջում է աննախադեպ փոխհատուցում ավելի քան 109 միլիոն դոլարի չափով։
Այս մասին հայտնում է CBS News-ը։
Գործի նյութերի համաձայն՝ Մետան խախտել է Էմինեմի երաժշտական կատալոգից 243 ստեղծագործությունների հեղինակային իրավունքը՝ իր հարթակներում թրեքների չթույլատրված պահպանման, վերարտադրման և կոմերցիոն օգտագործման միջոցով։ Հայցում հատուկ ուշադրություն է դարձվում այնպիսի գործիքներին, ինչպիսիք են Original Audio-ն և Reels-ը, որոնք, ըստ հայցվորի, ոչ միայն թույլ են տալիս, այլև ակտիվորեն խրախուսում են օգտատերերին օգտագործել երգչի երաժշտությունը տեսաբովանդակության մեջ՝ առանց համապատասխան լիցենզիայի և վերագրման:
Մարշալ Բրյուս Մաթերս III-ը, որն աշխարհին ավելի հայտնի է Էմինեմ անունով, բոլոր ժամանակների կոմերցիոն առումով ամենահաջողակ ռեփ կատարողներից մեկն է, որն ամբողջ աշխարհում վաճառել է ավելի քան 220 միլիոն ալբոմ: Նա արժանացել է 15 Գրեմմի մրցանակի, իսկ The Marshall Mathers LP-ն համարվում է ԱՄՆ պատմության ամենաարագ վաճառվող ալբոմներից մեկը։
Հրատարակիչը պահանջում է 150,000 ԱՄՆ դոլարի չափով օրենքով սահմանված վնասի փոխհատուցում բոլոր երեք Meta հարթակներում 243 երգերից յուրաքանչյուրի համար՝ ընդհանուր 109,350,000 ԱՄՆ դոլարի դիմաց:
