Մենք չենք հավատում, որ պարտված Հայաստանը կարող է իսկապես հզոր բանակցել թե՜ Հայաստանի հողային ամբողջականությունը, եւ թե՜ ապագա զարգացումը ապահովելու համար։ Այս մասին լրագրողների հետ զրույցի ժամանակ ասաց ՀՅԴ Բյուրոյի ներկայացուցիչ Հակոբ Տեր-Խաչատուրյան։ Նրա խոսքով՝ կասկած չկա, որ Հայաստանի անկախության 33 տարվա ընթացքում մենք կարողացանք ստեղծել բավական լուրջ պետականություն։
«Այս շրջանում ստեղծվեց հզոր բանակ, ունեցանք առաջին Արցախյան գոյամարտի հաջող ելք եւ միջազգային հարթակի վրա Հայաստանը ձեռք բերեց բավական լուրջ արժեք», - նշեց ՀՅԴ Բյուրոյի ներկայացուցիչը։ Սակայն նրա խոսքով՝ այս վերջին շրջանում իրավիճակը, անշուշտ, փոխվել է։
Հիմնական դժվարությունները, Հակոբ Տեր-Խաչատուրյանի կարծիքով, կապված են այս իշխանությունների առհասարակ բաժանարար քաղաքականության, Արցախյան ճգնաժամի եւ արդեն իսկ Հայաստանի անվտանգության հարցերի հետ։ «Հանձնվողական եւ պարտվողական քաղաքականության հետեւանքով, որպես արդյունք, Հայաստանը այլեւս չի վայելում այն վարկը, որ պետք է վայելեր որպես հզոր, զարգացող, եւ, վերջ ի վերջո, իր արժանապատվությունը պաշտպանող երկիր», - շեշտեց Հակոբ Տեր-Խաչատուրյանը։ Նա հավելեց, որ սահմանազատման եւ սահմանագծման գործընթացները շարունակական միակողմանի զիջումներով չպետք է առաջնորդվեն։
