Հաշվի առնելով այն, որ ես ՊՆ-ում պաշտոնավարել եմ նաև որպես առաջին տեղակալ բավականին երկար ժամանակաշրջան և իմ բացակայությունը ՊՆ-ից 1.5 տարի է եղել, ինձ վերաբերելի մասով ԶՈՒ վիճակը գնահատվում էր բավարար Հայաստանի դեմ ուղղված և Արցախի Հանրապետության ժողովրդի անվտանգության ապահովման համար, ԶՈՒ-ն պատրաստ էր իրենից 2-3 անգամ գերազանցող ուժի դիմակայել: Այս մասին այսօր՝ օգոստոսի 1-ին, ԱԺ 44-օրյա պատերազմի հանգամանքներն ուսումնասիրող քննիչ հանձնաժողովի նիստի ժամանակ ասաց պաշտպանության նախկին նախարար Դավիթ Տոնոյանը՝ անդրադառնալով հարցին, թե Պաշտոնի նշանակվելիս ինչ վիճակում եք ընդունել ՊՆ-ն եւ ԶՈՒ-ն, ինչքանով էր պատրաստ մեր բանակը հնարավոր պատերազմին:
«Հաշվի առնելով պատրաստությունը, աշխարհագրությունը և այն բնագծերը, որտեղ մեր Զինված ուժերը գտնվում էին։ Դա իմ գնահատականը չէ, դա հաշվարկված, փաստարկված տեղեկատվություն է։ Պաշտպանական մարտ վարելու, պաշտպանական կեցվածք ունենալու առումով Զինված ուժերի պատրաստվածությունը բավարար էր»,-ասաց նա:
Հարցին, թե արդյոք ուժերի հարաբերակցությունը մեկը երկուսի կամ մեկը երեքի էր պատերազմի սկզբին, հատկապես հաշվի առնելով, որ բաց աղբյուրների համաձայն, օրինակ, «Սմերչ» համակարգերի դեպքում 6-ը ընդդեմ 40-ի է, նախկին նախարարն պատասխանեց. «Ես պատասխանեցի մեր պատրաստականության մասին, ես չեմ ասում, թե ինչպիսին է եղել իրական վիճակը»:
