ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանին պաշտոնից հեռացնելուց հետո նույն հանձնաժողովի փոխնախագահ Ռուստամ Բաքոյանը իր հաղթանակն է տոնում խորհրդարանում: Այս մասին գրում է «Հրապարակ» թերթը։
«Բաքոյանը, ՔՊ խմբակցության ղեկավար Հայկ Կոնջորյանը, քարտուղար Արթուր Հովհաննիսյանն ու պաշտպանության հանձնաժողովի նախագահ Անդրանիկ Քոչարյանը, մեր աղբյուրի փոխանցմամբ, հիմա զբաղված են Ռուստամ Բաքոյանից հանձնաժողովի նախագահի կերպար կերտելով՝ «դասընթացներ» են պատրաստել՝ ինչպես նիստ վարել, ինչպես խոսել, երբ հայտարարություն տարածել»,–գրում է թերթը:
«Հրապարակը» տեղեկացել է նաև, որ Թագուհի Թովմասյանը իրեն պաշտոնազրկելուց 3 ժամ հետո ծառայողական ավտոմեքենան հանձնել է ԱԺ-ին:
Այդ մեքենայով, ըստ ԶԼՄ–ի, արդեն Բաքոյանն է շրջում, ինչը ՔՊ-ում ոչ միանշանակ է ընդունվել: Բացի այդ, Հայկ Կոնջորյանի հետ արդեն քննարկել է ՄԻՊ հանձնաժողովի փորձագետների հարցը:
«Քանի սույն հանձնաժողովի փորձագետները ՔՊ-ական չեն, որոշել են բոլորին ազատել, մաքրել հանձնաժողովը Թովմասյանի օրոք նշանակված բոլոր կադրերից՝ նրանց փոխարեն ՔՊ-ականների բերելով»,–գրում է թերթը:
