ԱԺ կանոնակարգ օրենքի համաձայն բացակայությունների թույլատրելի շեմը հատել է 10-ից ավելի պատգամավոր։ Սույն թվականի մայիսի 11-ի դրությամբ տեղի ունեցած 193 քվեարկության արդյունքներով առաջին 10 բացակայող պատգամավորների թվում են՝ Արմեն Չարչյան՝ 153 բացակա՝ 34 հարգելի, Գեղամ Մանուկյան՝ 129 բացակա՝ 1 հարգելի,  Արթուր Վանեցյան՝ 115 բացակա՝ 0 հարգելի,  Անդրանիկ Թևանյան՝ 105 բացակա՝ 1 հարգելի, Ասպրամ Կրպեյան՝ 103 բացակա՝ 1 հարգելի,  Արմեն Ռուստամյան՝ 102 բացակա՝ 1 հարգելի,  Լիլիթ Գալստյան՝ 99 բացակա՝ 1 հարգելի, Արթուր Ղազինյան՝ 99 բացակա՝ 1 հարգելի, Վահե Հակոբյան՝ 98 բացակա՝ 1 հարգելի։

Սակայն, ըստ ԱԺ կանոնակարգի, պատգամավորները մինչ այս նստաշրջանի ավարտը՝ հուլիսի 17-ը, չեն կարող զրկվել մանդատներից: Ըստ Սահմանադրական օրենքի 156-րդ հոդվածի՝ յուրաքանչյուր օրացուցային կիսամյակի ընթացքում քվեարկությունների առնվազն կեսից անհարգելի բացակայելու դեպքում պատգամավորի լիազորությունները դադարեցնելու հարցով սույն հոդվածով սահմանված կարգով Սահմանադրական դատարան է դիմում ԱԺ խորհուրդը, ինչպես նաև կարող է դիմել պատգամավորների ընդհանուր թվի առնվազն մեկ հինգերորդը:

Յուրաքանչյուր պատգամավորի բացակայությունների վերաբերյալ հարցը քննարկվում է առանձին: Քննարկման ընթացքում պատգամավորը կամ նրա լիազորած այլ պատգամավոր կարող են ելույթ ունենալ, պատասխանել հարցերին, հանդես գալ եզրափակիչ խոսքով:

Եթե հարցի քննարկումը սկսվելուց հետո՝ երկշաբաթյա ժամկետում, Խորհուրդը պատգամավորի լիազորությունները դադարեցնելու հարցով Սահմանադրական դատարան դիմելու մասին որոշում է ընդունում, ապա Ազգային ժողովի նախագահն այն 24 ժամվա ընթացքում ուղարկում է Սահմանադրական դատարան՝ նշելով Սահմանադրական դատարանում հարցի քննության ընթացքում որպես ներկայացուցիչ հանդես գալու իրավունք ունեցող անձի անուն-ազգանունը: Եթե Խորհուրդը չի ընդունում, ապա Սահմանադրության 169-րդ հոդվածի 1-ին մասի 2-րդ կետի համապատասխան՝ պատգամավորների ընդհանուր թվի առնվազն մեկ հինգերորդը կարող է ոչ ուշ, քան մեկ ամսվա ընթացքում պատգամավորի լիազորությունները դադարեցնելու հարցով դիմել Սահմանադրական դատարան:

Նշենք նաև, որ յուրաքանչյուր խմբակցություն նստաշրջանի ընթացքում հնարավորություն ունի մեկ անգամ բոյկոտել նիստերը: «Հայաստան» և «Պատիվ ունեմ» խմբակցությունները նախկինում օգտվել են իրենց այդ հնարավորությունից: Այժմ, նրանք փողոցային պայքարի են դուրս եկել և կրկին չեն մասնակցում ԱԺ աշխատանքներին, իսկ իշխանական պատգամվորներն առիթը բաց չեն թողնում ասելու, որ ամեն ինչ անելու են նրանց մանդատից զրկելու համար։

Իրավապաշտպան Ռուբեն Մելիքյանը բացակայությունների հացի շահարկումը համարում է ճնշում ընդդիմության նկատմամբ։ «Այդ ճնշման միջոցը,  կարծում եմ,  իրավաչափ չէ, քանի որ ԱԺ պատգամավորների բացակայությունը քաղաքական բնույթ կրող արտահայտման իրավունքի դրսևորում է։ Նրանք բացատրել են՝ ինչու չեն մասնակցում ԱԺ նիստերին և իրենց տրված մանդատն իրացնում են այն շրջանակներում, որոնց համար ընդդիմադիր պատգամավորների ընկալմամբ նրանց տրվել է այդ մանդատը։ Այն չի տրվել նրանց գնալ և ԱԺ-ում ՔՊ-ի բերած օրինագծերի քվեարկության մասնակցելու ձևով։ Այս առումով, կարծում եմ, այն կհակասի քաղաքական գործունեության ազատությանը։ ԱԺ պատգամավորներն իրենց գործունեությունն իրականացնում են իրենց տրված մանդատի շրջանակներում՝ տվյալ դեպքում այն օգտագործվում է բողոքի ակցիաները կազմակերպելու, այդ մանդատի հիման վրա անարգել ոստիկանական  բաժանմունքներ և այլ վայրեր մուտք  գործելու համար»,- ասաց իրավապաշտպան Մելիքյանը։

Ինչ վերաբերում է կանոնակարգ օրենքի պահանջներին՝ Մելիքյանն ասում է, որ այստեղ խնդիրը բացակաների հարգելի լինել-չլինելու խնդիրն է և կարծում է, որ պիտի բացակաները լինեն հարգելի, քանի որ պատգամվորներն իրենց տանը նստած չեն, այլ զբաղվում են քաղաքական գործունեությամբ՝ ինչ համար էլ իրենց տրվել է  մանդատ։ Իսկ այդ գործունեությունն, ըստ Մելիքյանի՝ պաշտպանում են ՀՀ տասնյակ  հազարավոր, եթե ոչ հարյուր հազարավոր քաղաքացիներ։