ՀՀ իշխանությունների առաջարկած, այսպես կոչված, խաղաղության դարաշրջանը պատերազմի, կործանման եւ առնվազն Հայաստանի մասնատման կբերի։ Այս մասին ապրիլի 15-ին քննարկման ժամանակ ասաց ՀՀ ԱԺ նախկին պատգամավոր Արման Աբովյանը։
Պատմելով արցախցիների տրամադրությունների մասին, որտեղից Աբովյանը վերջերս է վերադարձել, նա ասաց, որ հիասթափություն չի տեսել:
«Այնտեղ մարդիկ պատրաստ չեն այսպես կոչված խաղաղության դարաշրջանի զոհեր դառնալ։ Արցախում համընդհանուր կոնսենսուս կա, չեն համաձայնի ուղղակի մեռնել ու պատրաստ են պայքարել: Անկախ Հայաստանի իշխանությունների գործողություններից՝ Արցախում հասկանում են, որ նահանջելու տեղ չունեն, ինքնասպանության գնալ չեն ցանկանում։ Արցախը չի ընդունի Հայաստանի գործողությունները, որոնք կվտանգեն Արցախը եւ արցախահայության անվտանգությունը: Իսկ արցախցիներից մեկը, ում հետ ես զրուցեցի, ՀՀ իշխանությունների խոսքերն որպես պատերազմի հայտարարում ընդունեց եւ հասկացրեց, որ Արցախի հանձնումը Հայաստանին խաղաղություն չի բերի, հակառակը, կարագացնի բուն Հայաստանի ոչնչացման գործընթացը»,- ընդգծեց նա։
Նախկին պատգամավորի խոսքով՝ Թուրքիան եւ Ադրբեջանը կուժեղացնեն սադրանքները, եւ դա վկայում է այն մասին, որ այսպես կոչված խաղաղության շուրջ բոլոր գործընթացներն արագորեն մոտեցրել են պատերազմի վտանգը։
«Իշխանությունները չեն թաքցնում իրենց նպատակները, եւ եթե հասարակական դժգոհություն չկա, ապա դա որպես համաձայնություն է ընկալվում, թեեւ իշխանություններին ոչ ոք ձայն չի տվել, որպեսզի գործը դեպի Արցախի հանձնումը տանեն։ Բայց եթե քաղաքացիները համաձայն են իշխանությունների գործողությունների հետ, ապա իշխանությունները կմնան։ Բանաձեւը պարզ է. Եթե ՀՀ քաղաքացին չպայքարի հանուն Հայաստանի եւ Արցախի, իր երեխաների կյանքի, ապագայի համար, ապա ոչ ոք դա չի անի նրա փոխարեն։ Այն, ինչում այսօր փորձում են մեզ համոզել, ոչ այլ ինչ է, քան պետական ինքնասպանություն։
Այսօրվա պայմաններում այն պետությունները, որոնք պատրաստ են պայքարել իրենց իրավունքների, իրենց անկախության համար, կունենան ապագա, իսկ մնացածը կործանման վտանգի առջեւ կկանգնեն։
Ստեղծված իրավիճակում ՀՀ քաղաքական ուժերը եւ հասարակական կազմակերպությունները պետք է առնվազն երկու դիրքորոշում ունենան՝ առաջին, որ պետությունը դեմոնտաժի է գնում, եւ երկրորդ՝ արդյո՞ք մենք պատրաստ ենք դրան»,- նշեց Աբովյանը։
