Երկիրը պատերազմի հասցրած, Արցախը թուրքի առաջ կապիտուլացրած Նիկոլ
Փաշինյանը դեռ ինչ-որ սոցիալական հենարան ունի: Ո՞րն է դրա ֆենոմենը: Ի՞նչն է որոշ
մարդկանց դեռ ստիպում սատարել Փաշինյանին ու իր թիմին: Պատասխանը եկեք փնտրենք մեր
կողքին:
Վերջերս Նիկոլ Փաշինյանը ԲՀԿ պատգամավորներին մեղադրում էր «ղազագիր»
ստորագրելու մեջ, բայց պարզից էլ պարզ է, որ տասնամյակներ շարունակ կիրառվող այդ արատավոր
համակարգը միակ միջոցն է եղել «հավատարիմների» թիմ պահելու ամենավստահելի միջոցը և
ինքը Նիկոլը դրանից չօգտվել չէր կարող: Եթե դա իր պատգամավորների ու նախարարների, արևմտյան
բազմաթիվ գրանտակեր, ազգադավ կազմակերպությունների էմիսարների մասով կարող էր լինել
գրավոր փաստով, ապա հասարակության դեպքում դա բոլորովին այլ մեխանիզմ է ունեցել: Դեռևս
«թավշյա» օրերին որոշ մարդիկ ակամա ստորագրում էին այդ ղազագրերն իրենց գործողություններով՝
պատգամավորներին ու նախարարներին սպառնական հեռախոսազանգերով, նրանց տների մոտ դագաղներ
դնելով և այլն: Հետո, երբ արդեն «քայլողները» իշխանության էին, իսկ երկրում մոլեգնում
էր սև-սպիտակ վենդետան, մարդիկ կային, որ մատնություններ էին կատարում իրենց հարևանի,
մտերիմի, ղեկավարի, հրամանատարի վերաբերյալ: Այսինքն Նիկոլի քաղաքացիական պայմանագիրը վերափոխվեց սոցիալական ղազագրի: Դրանք այս իշխանությունների սոցիալական
«ոսկե» ֆոնդն են, որ թեև նախկինների «թալանից» ոչ մի լումա չստացավ, բայց իրավունք
ստացավ շարունակել պաշտոնավարումը, չմուծել ՃՈ տուգանքները, որոշակի հմտությունների
առկայության դեպքում ընդգրկվեց ֆեյքերի ֆաբրիկաներում և այլն: Չեմ պատկերացնում, թե
ի՞նչ աստիճանի տգետ ու անզգամ պետք է լինել, դավաճանությունը չտեսնելու, զոհված հարազատի
շիրիմը մոռանալու ու Նիկոլին պաշտպանելու համար: Բայց դա ոչ թե գիտակցական մակարդակում
է արվում, այլ ենթագիտակցական, ինքնապաշտպանական բնազդների հիման վրա: Այդ մատնիչներն
ու պատեհապաշտները լավ գիտեն, որ վաղը, երբ այլևս իրենց կուռքը իշանության չլինի, իրենց
բոլոր մեղքերի համար պատասխան են տալու, իրենց լափածի համար բազմապատիկ են վճարելու:
Դրա համար էլ հիմա ատամներով պահում են ոչ թե Նիկոլի իշխանությունը, այլ իրենց մաշկը,
որովհետև, Նիկոլի առաջ ղազագիր ստորագրելով, այրել են իրենց շրջապատի հետ բոլոր կամուրջները:
Այս օրերին այդ խաժամուժին ավելացավ նաև «սելֆիդայիների» բանակը, ում առաջիկայում բանտախուցն
էր սպասում:
Ինքնախաբեություն է, թե դեռ «մոլորվածներ» կան, իսկ ով շարունակում
է մնալ այս իշխանության ու վարչապետի կողքին, այս կամ այն կերպ Նիկոլի մոտ ղազագիր
է ստորագրել և անցել անդառնալիության սահմանը:
