Վարչապետ Նիկոլ Փաշինյանը հինգշաբթի երեկոյան աշխատանքային այցով ժամանել է Թուրքմենստանի մայրաքաղաք, որտեղ այսօր մասնակցելու է ԱՊՀ պետությունների ղեկավարների խորհրդի նիստին։
Աշխաբադի միջազգային օդանավակայանում Հայաստանի վարչապետին դիմավորել են Թուրքմենստանի փոխվարչապետ Էսենմուրադ Օռազգելդիեևը և ԱՊՀ գլխավոր քարտուղարի առաջին տեղակալ Վիկտոր Գումինսկին։
Այսօր Նիկոլ Փաշինյանն արդեն հանդիպում է ունեցել Թուրքմենստանի նախագահ Գուրբանգուլի Բերդիմուհամեդովի հետ: «Քննարկեցինք երկկողմ և բազմակողմ օրակարգի բազմաթիվ հարցեր», - հանդիպման մասին գրել է Հայաստանի վարչապետը Ֆեյսբուքում:
Աշխաբադում Նիկոլ Փաշինյանը հանդիպում է ունենալու նաև Ուզբեկստանի նախագահ Շավքաթ Միրզիյոևի հետ, ասված է Հայաստանի վարչապետի աշխատակազմի տեղեկատվության և հասարակայնության հետ կապերի վարչության հաղորդագրությունում:
