Իշխանություններն ու վարչապետը տնտեսական հեղափոխության մասին խոսում են ամենուր, բոլոր հարթակներում կոչ են անում ներդրումներ կատարել Հայաստանում, բնակարան գնել, վերադառնալ հայրենիք, բայց սայլը տեղից չի շարժվում:
Հիմա էլ «գտել» են հերթական մեղավորին՝ բրոկերներն են մեղավոր, որ տների գները բարձրացել են ու չեն վաճառվում:
«Զուլում» տնտեսագետ պետք չէ լինել, հասկանալու համար, որ բրոկերները շահագրգռված են շատ վաճառել, որ շատ վաստակեն, իսկ շատ վաճառելու համար պետք է էժան վաճառել: Ա՛յ իրական պատճառները գտնելու համար իրոք լավ տնտեսագետ պետք է լինել: Կա՞ մեկը, որ բնակարանների թանկացման պատճառները փորձի փնտրել երկրում վարվող հիպոթեքային քաղաքականության, գույքահարկի առաջարկվող փոփոխությունների կամ կապիտալ շինարարության ծավալների նվազման մեջ: Համենայն դեպս, գոնե ոլորտի պատասխանատուների շարքերից ես դեռ չեմ հանդիպել:
Միայն անշարժ գույքի ոլորտը չէ, որտեղ «դրսից» մեղավորներ են նշանակվում: Նույն բանը ներդրումների, բնապահպանության, աշխատաշուկայի, կրթության ու մյուս ոլորտներում է:
Օրինակնե՞ր, խնդրեմ:
Հոկտեմբերի սկզբին Երևանում անցկացվում էր Եվրասիական գործընկերության միջազգային չորրորդ համաժողովը: Տարբեր երկրներից խոշոր գործարարները Ռուսաստանի հայերի միության նախագահ, ՅՈՒՆԵՍԿՕ-ի բարի կամքի դեսպան Արա Աբրահամյանի հրավերով հավաքվել էին քննարկելու Հայաստանի հետ համագործակցության, ներդրումներ կատարելու հնարավորությունները: Ի՞նչ էք կարծում, կառավարությունից քանի՞ հոգի էր մասնակցում համաժողովին, քանիսի՞ն է իրապես հետաքրքրում երկրում տնտեսական հեղափոխությունը, բացի դրա մասին բարձր ամբիոններից գովազդելը. ՈՉ ՄԵԿԸ: Ո՞վ է մեղավոր՝ արտասահմանցի ներդրողը, որ ողջ երկրում ոչ մի չինովնիկ չգտավ այդ օրը:
Մի այլ դրվագ: Կառավարության նիստերի ընթացքում, հենց խոսք է գնում Սևանի մասին, Նիկոլ Փաշինյանը «ձեռքը տանում է դեղերին»: Գարնանը Արտակարգ իրավիճակների նախարարը հայտարարեց, որ այս տարի լճի մակարդակը մոտ 40 սմ-ով (կոնկրետ թիվը չեմ հիշում) բարձրանալու է: Ի՞նչ եք կարծում, Սևանն այդքան բարձրացե՞լ է, Սևանում կապտականաչ ջրիմուռները վերացե՞լ են, Ցոլակյանը վարչապետի գլխավոր խորհրդական նշանակվե՞լ է: Իհարկե՝ ոչ: Արդյունքում ունենք այն, որ Փաշինյանն այսօր արդեն հորդորում է զբոսաշրջիկներին Սևան չտանել, որովհետև ափամերձ օբյեկտները «կատաստրոֆիկ» չափերով աղտոտել են տարածքը: Այն օբյեկտները, որոնց տերերը ամռանը ճանապարհ էին փակում ու որոնց բիզնեսին սատարելու համար պետական պաշտոնյաները նույնիսկ լճի կանաչած ջուրն էին խմում տեսախցիկների առաջ: Մի գաղտնիք էլ բացեմ, որը ցանկացած մեկը կարող է հենց այսօր ստուգել. Սևանի մակարդակը ոչ մի սանտիմետր էլ չի բարձրանա և դրա պատճառը ոչ թե ափամերձ օբյեկտների ու ամառանոցների տերերն են, այլ այն, որ նույնիսկ մի քանի սանտիմետրով բարձրանալու դեպքում ջուրը կծածկի Մարտունի-Վարդենիս ստրատեգիական նշանակության ավտոմայրուղու զգալի մասը: Ո՞վ է մեղավոր՝ ափամերձի գործարարը:
Մի խոսքով՝ եթե ինչ-որ մեկին ձերբակալում են, դա իշխանությունների հաջողությունն է, իսկ երբ մեղադրանքը չի հաստատվում՝ հակահեղափոխականները կան ու կան:
Հ.Գ. Կառավորության նիստերի դահլիճում տեղական արտադրության համակարգիչներ են դրված, բայց այս օրերին WCIT-2019-ը հյուրընկալող երկրի նախարարները օգտագործում են իրենց սեփական արտասահմանյան համակարգիչները: Ո՞վ է մեղավոր՝ ես չգիտեմ, գուցե Չերչի՞լը:
